Recent Articles

ළඟදීම මම මනා­ලි­ය­ක් ­වෙ­න, තිසුරි යුව­නිකාගේ අත ගන්නේ සුරාජ්!

ගෙවුණු මාස කිහිපය පුරා රංගන ශිල්පිනියන් බොහෝ දෙනකුට මංගල සීනු හැඬවුණා. නුදුරේදීම කලා ක්ෂේත්‍රයේ දක්ෂ රංගන ශිල්පිනියකට මංගල සීනු හැඬවෙන්න නියමිතයි. ඇය තිසුරි යුවනිකා. ළමා නිළියක් ලෙසින් ක්ෂේත්‍රයට පැමිණෙන ඇය වර්තමානයේ නැතිවම බැරි රංගන ශිල්පිනියන් අතරින් එක් කෙනෙක් කිව්වොත් නිවැරැදියි. අලුත් අවුරුද්දේ අලුත් බලාපොරොත්තු සමඟ තිසුරි තමන්ගේ අනාගතය පිළිබඳව සැලසුම් කර ඇත්තේ කොහොමද කියලා හා හා පුරා කියලා රසඳුනට කිව්වා.

 සුබ අලුත් අවුරුද්දක් තිසුරි !

එසේම වේවා.

මේපාර අවුරුද්ද සමරන්න විශේෂ අමුත්තෙක් එකතු වුණා කියලා ආරංචියි.

නෑ නෑ... විශේෂ කෙනා එකතු වෙන්නේ ලබන අවුරුද්දේ.

තිසුරිත් නොබෝ දිනකින් මනාලියක් වෙනවා. මේ දිනවල වැඩ වැඩි ඇති නේද ?

ඔව්.. තව මාස කිහිපයකින් මාත් මනාලියක් වෙනවා. වැඩ කියන්නේ... වැඩ වැඩිත් නැහැ.. වැඩ අඩුත් නැහැ..

විවාහයට ප්‍රමාද වුණා වැඩි නැද්ද?

නැහැ. මම හිතනවා හොඳම කාලය තමා මේ ඇවිත් තියෙන්නේ කියලා. සමහරුන් ගේ මතයක් තියෙනවා ගැහැනු ළමයෙක් අවුරුදු 20, 21 ක වෙද්දී විවාහ වෙන්න ඕන කියලා. මම කිසිම වෙලාවක ඒ තැන හිටියේ නැහැ. මගේ වාසනාවට මාගේ අම්මයි තාත්තයි එතැන හිටියෙත් නැහැ. මගේ පෞද්ගලික මතය නම් අත්දැකීම් කෙසේ වෙතත් වයස පොඩ්ඩක් යනතුරු ඉන්න ඕන. මාගේ වාසනාවට මාගේ අම්මටයි තාත්තටයි මාව කලින් බන්දලා දෙන්න කිසිම හදිස්සියක් තිබුණේ නැහැ. සුදුසු වයස තමා මේ ඇවිත් තියෙන්නේ කියලා මම හිතනවා.

තිසුරි බලාපොරොත්තු වුණු සහකරුවමද ලැබුණේ?

හ්ම්.. ඔව්. කොහොමත් මම ඉස්සර ඉඳලම හිතාගෙන හිටියේ මම යාළු වුණොත් යාළු වෙන්නේ කවදාහරි විවාහ වෙන්න බලාගෙන කියලා. ඉතින් ඒ දේවල් හැම දෙයක්ම ඒ විදියට වුණා. සුදුසු කෙනා තමා මට මේ ලැබිලා ඉන්නේ.

ආදරය ගැන කතා කරමු ද?

කතා කරමු. අපේ ආදරේට අවුරුදු 4 ක් වෙනවා. ඔහු සුරාජ් විජේසිංහ. එයාගේ තාත්තයි මාගේ තාත්තයි හොඳ යාළුවෝ. ඒ නිසා අපිත් පොඩි කාලේ ඉඳන්ම යාළුවෝ. යාළුවෝ විදියට අපි ගොඩක් කල් හිටියා. කාලයත් එක්ක එයා එයාගේ හිතේ තියෙන දේ මට කිව්වා.

යාළුකම ආදරේට පෙරලෙද්දී තිසුරි ඔහු ගෙන් විශේෂයෙන් බලපු දේවල් ඇති නේද?

අපි පොඩි කාලේ ඉඳන්ම හඳුනන නිසා එයාගේ හැමදේම මම දන්නවා. එයත් එහෙමයි. ඉතින් මම හිතනවා ඒ දැන හැඳුනුම්කම උඩ තමා අපි දෙන්නගේ කැමැත්ත ඇති වුණේ. මාගේ යාළුකම ආදරයකට පෙරලූනෙත් ඒ නිසා වෙන්න ඇති.

ඒ වගේම මම හැමදාම කිව්වේ සහ හෙව්වේ මාගේ අම්මටයි තාත්තටයි පුතෙක් වෙන්න ඕන කෙනෙක්ව. මම පවුලේ එකම ළමයා. ඉතින් පවුලට සම්බන්ධ වෙන කෙනා අනිවාර්යෙන්ම හොඳ කෙනෙක් වෙන්න ඕන. සුරාජ් ඒ වගේ කෙනෙක්. මාගේ හිතේ මැවුණු කෙනා එයා තමා කියලා මට හිතුණා. එයා මගේ අම්මටයි තාත්තටයි ගොඩක් ආදරෙයි. ඒ හැමදේම මත යාළුකම ආදරේකට පෙරළුණා. ඒ දේවල් තමා ඉතින් විශේෂ වුණේ මට.

කලාව පැත්තෙන් මොනවද මේ දිනවල කරන වැඩ?

මේ දවස්වල සමන් කුමාර අයියගේ නේත්‍රා කියලා නාට්‍යයක් කරනවා. ඊට අමතරව මේ දිනවල විකාශනය වන උරුමයක අරගලය කියලා ටෙලි නාට්‍යක වැඩ කටයුතු සඳහා සම්බන්ධ වුණා. ඒ වගේම මම ඉදිරිපත් කරන විවාහ වැඩසටහන කරගෙන යනවා.

දැනටමත් රංගනය වෙනුවෙන් සිමා මායිම් පනවා ගෙන ඇති නේ?

නැහැ එහෙම එකක් නැහැ. එයා දන්නවා මම රඟපානවා කියලා. මම කවුද කියලා දන්නවා. ඉතින් ඒක නිසා මාගේ රැකියාවට කිසිම බාධාවක් වෙන්නේ නැහැ. මම භාර ගත්ත නිර්මාණ මම කරනවා. විවාහ වුණා කියලා මාගේ රංගන ජීවිතය බාධාවක් කර ගන්නේ නැහැ. හොඳ නිර්මාණ ලැබුණොත් මම කරනවා.

(නිලු­පුලි සඳ­කැ­ලුම් - සිළුමිණ)

ළඟදි බඳිනවද? එහෙනම් නටන්න.

Model : Diana K. Hettiarachchi
 | Ape Arts Photography| Dressing by Salon Ruwelma

විවාහය යෞවනයේ සුන්දරතම අවස්ථාව බවට විවාදයක් නැත. පාසල් විය අවසන් කළ පසු අති බහුතරයක් තරුණ පිරිස සිහින මවන්නේ 'ලස්සන වෙඩිංඑකක්' ගැනීමටය. එතනින් එහාට පවුල් කන විදිහ ගැන එතරම් තැකීමක් නැති වුවද වෙඩිංඑක නම් ලස්සනට තිබිය යුතුමය.

මෙවැනි හීන ගැන අපේ විවේචනයක් නැත. ජීවිතවල සිහින තිබිය යුතුමය. වෙඩිංඑක පමණක් නොව එතනින් එහාට ජීවිතයද සුන්දර විය යුතුය. එහෙත් තරුණ තරුණියන්ගේ සුන්දර සිහින අතරට මාකටිං කාක්කන් රිංගාගෙන මඩිය තර කර ගන්නේ නම්, ඔවුන්ගේ සිහින අලෙවි කරන්නේ නම්, එවැනි තැන් ගැන අවදියෙන් සිටිය යුතුය.

අද වන විට අපේ රටේ බොහෝ දෙනකුගේ ආදායම් මාර්ගය වන්නේ වෙඩිංය. ඔවුන්ගේ ආදායම සරු වීමට නම් දෙදෙනෙක් විවාපත් විය යුතුමය. මේ විවාපත්වන ප්‍රමාණය වැඩි නම් අතමිට සරුය. ආදායම හොඳය. ඒ නිසා බිස්නස්එක බෙහෙවින් තරගකාරීය. බොහෝ ලාභ ලැබිය හැකි නිසාම ෆීල්ඩ්එකට එන පිරිසද වැඩිය. ඊට සාපේක්ෂව කසාද බඳින්නන් අඩුය. ඒ නිසාම පළමුවැනි විවාහය දික්කසාද වී දෙවැනි වර විවාහ වන විටද රටට ලෝකෙට පේන්න හොඳ වෙඩිංඑකක් ගැනීමේ සංස්කෘතියක්ද ක්‍රමයෙන් මතුව ආවේය. ඇතැම්විට මෙය තෙවැනි විවාහ උත්සවය දක්වාද ඇදගෙන යන්නට සමත් වූ අවස්ථා විය.

මෙසේ කිරීමට තරම් ලැජ්ජා බය නැති පිරිස සාපේක්ෂව අඩු නිසාදෝ පළමුවැනි වෙඩිංඑක තුළම බොහෝ දේ විකුණා ගැනීමට කටයුතු කිරීමට වෙඩිං කාක්කන්ට සිදුව තිබේ. විවාහ උත්සවය විහිළුවක් වන්නට පටන් ගන්නේ එතැන් සිටය.

අතීතයේ අපේ රටේ විවාහ සංස්කෘතිය ගැන අමුතුවෙන් සිහිපත් කළ යුතු නැත. එක හිත ඇති බැවිනුන්, වංචාවක් කිරීමට හෝ වගකීම් පැහැර හැරීමට සිහිනෙකින් හෝ නොසිතූ බැවිනුත් නීති පොතේ සටහන් තැබීමක් අවශ්‍ය වූයේද නැත. ඉන්පසු පරම්පරාව සිහිවටනයක් ලෙස, දරු මුණුබුරන්ට ආදර්ශයක් ලෙස මගුල් දවසේ ඡායාරූපයක් ගෙන, රාමු කර හැමෝටම පෙනෙන ලෙස ගෙයි එළිපත්තට බසින තැන බිත්තියේ ඉහළින් එල්ලා තැබීමේ සංස්කෘතියක් විය.

මගුල් ෆොටෝ ගැනීම ලාබදායී ව්‍යපාරයක් බව වටහා ගත් පසු බිත්තියේ එල්ලූ ලොකු ෆොටෝඑක සමග ඡායාරූප ඇල්බමයක් පැමිණියේය. එයද ඉවසිය හැකිය. ඒ සියල්ල සිහිවටනය. නම්බුකාර විදිහට දීග ආ හැටි පරම්පරාවට පෙන්වන්නට අපූරුය. එහෙත් මේ ඡායාරූප ඇල්බමය ද එතනින් නැවතීමට සූදානම් වූයේ නැත.

ඇල්බම් එක එක විදිහට ආවේය. ඇතැම් එවා ඇල්බම් නොවේය. 'කතන්තර පොත්' ය. ඒ මදිවාට වීඩියෝ කරන්නටද කට්ටිය බිහි විය. මගුල් දවසේ සජීවී රූප රාමු සමග ඇද වැටුණු අවස්ථා, මනාලිය වඩාගෙන හති දමමින් වටේ කැරකුණු අවස්ථා, නහය කැසූ, හොටු හිරූ අවස්ථාද මේ වීඩියෝවට ඇතුළත් කර තිබිණ.

'වෙඩිං බිස්නස්එක' එතනින්ද නැවතුනේ නැත. මේ අලුත් ට්‍රෙන්ඩ්ස් බලා ගැනීමට තරම් වෙඩිංවලට ඉන්විටේෂන් ‍ලැබෙන්නේ නැත. එහෙම වෙනඑක ගැන නම් අමනාපයක් නැත. නැතිනම් කරන්නට වන්නේ ඉතා අධික මිලක් වියදම් කර, ඇඳ පැලඳ, තෑගි බෝගද ගෙන ගොස් ඔහේ ඉඳගෙන ඉඳලා ගෙදර එන්නට සිදුවීමය.

එහෙත් මේ මිල අධික වෙඩිං බිස්නස් ගෙදර සාලයේ ඉඳගෙන, ඉතා සැප පහසුවට නොමිලේම බලා ගැනීමේ අවස්ථාව අපට අනේක විධ රූපවාහිනී නාලිකා මගින් උදා කර දී තිබෙන්නේය. සති අන්තයේ දවසක අහම්බෙන් හෝ රූපවාහිනිය ක්‍රියාත්මක කෙරුණ‍හොත් මෙවැනි වැඩසටහන් පහ හයක්ම දැක ගැනීමට හැකිය. මේ ලියන්නට හිතුනේද එවැනි වැඩසටහන් දැකීමෙන් ඇති වූ විශ්මය නිසාමය.

පුදුම වූයේ අන් කිසිවකට නොවේය. මේ වෙඩිං බිස්නස්එක ගොස් ඇති දුර වැටහී යෑමෙන්ය.

දැන් ‍මනාලියට සහ නහුතයක් පමණ කණ්ඩායමට ඇන්දවීමෙන් සහ ‍ෆොටෝ, වීඩියෝවලින් වෙඩිං බිස්නස්එක බොහෝ දුර ගොස්ය. එය කොතරම් දුර ගොස් ඇතිදැයි කිව හොත් මගුල් දවසේ මනාලිය ඒක පුද්ගල රංගනයක් ඉදිරිපත් කරන්නීය. ඉන් පසුව මනාලයා සිය මිතුරන් සමග තවත් රංගනයක් ඉදිරිපත් කරන්නේය. මල් කුමර කුමරියෝ තවත් නැටුමක් නටති. ඉන් පසුව නටන්නේ සල්ලි දීලා ගෙන්වා ඇති නැටුම් කණ්ඩායම්ය. මනාලියගේ සහ මනාලයාගේ මව, පියා ඇතුළු ඥාති සනුහරය නටන්නේ අන්තිමටය.

කොටින්ම කිව හොත් අද කාලේ වෙඩිංඑකකට යෑම හරියට බණ්ඩාරනායක සම්මන්ත්‍රණ ශාලාවේ රීදී රැයක් බලනවා හා සමානය. රීදී රැයක්ද බලා සිටීමට අමාරුය. එමෙන්ම මේ වෙඩිං නැටුංද බලා සිටීම ලෙහෙසු පහසු ක්‍රියාවක් නොවේය.

මට දක්නට ලැබුණු එක් වෙඩිමක මනාලිය මාල හත සමග ඔසරියකින් සැරසී, මල් පොකුර පසෙක තබා, සබා මැදට පැමිණ වේගවත් ඒක පුද්ගල නර්තනයක නිතර වූවාය. ඇය වෙඩිම වෙනුවෙන්ම නටන්නට පුහුණු වන්නට ඇතැයි සිතුණු සිතිවිල්ල තහවුරු කළේ නම්‍යශීලී නොවූ මෙන්ම, නර්ථනය ගෑවී හෝ නැති ඇයගේ සිරුරය. ඒ බව රූපවාහිනිය බලා සිටි මට මෙන්ම තවත් බොහෝ දෙනාට වැටහෙන්නට ඇත. එමෙන්ම මේ නර්ථන අයිඩියාඑක ලබා දී පුහුණු කළවුන්ටද ඇස් නැතිවා වෙන්නට බැරිය. එහෙත් ඇය එයින් වළකන්නට කිසිවකු කටයුතු කර තිබුණේ නැත.

ගොං අං තට්ටුවක් පැලඳ පුටුවක හිඳ සිටි මනාලයා වටා කරකැවෙමින් නටමින් ගිය මිතුරන් පිරිසක් 'ළපටි කැකුළු නාඹර වස්සා' කසාද බඳින බව පැවසූහ. ගීතය අති සුන්දරය. එහෙත් තමන්ට 'නාඹර වස්සා' යැයි පවසා ගැනීමට දහස් ගණන් වියදම් කිරීමෙන්ම මනාලයා 'නාඹර වස්සකු' බව ඔප්පු විය.

දැන් වෙඩිං හෝල්වල හෙවත් උත්සව ශාලාවල අසුන් පනවන්නේම නැටීමට ඉඩ ප්‍රමාණවත් වන පරිදිය. උත්සවයට සහභාගී වන අමුත්තෝ කෑම වෙලාව එනතුරු මනාලියගේ හෝ මනාලයාගේ හෝ නැතිනම් සමස්ත කණ්ඩායමේ හෝ ‍නැටුම් බලමින් සිටිති. නටන්නට බැරි යැයි බුද්ධිමත් ලෙස ස්වයං තක්සේරුවක නිරත වන මනාල මනාලියෝ ඒ වෙනුවෙන් මුදල් ගෙවා නැටුම් කණ්ඩායම් කැඳවති. එලෙස පැමිණෙන නැටුම් කණ්ඩායම් කරන්නේ උත්සවයේ සියලු දෙනාගේ අවධානය තමන් වෙත ලබා ගනිමින්, මනාල යුවළ දෙවැනි තැනට දමමින් නර්ථනයේ නිරත වීමය.

මීට අමතරව සෞභාග්‍යය සංඛේතවත් කරමින් රසායනික ද්‍රව්‍ය දමා උතුරුවන කිරි දහරාද වේ. මනාල යුවළ නොයෙක් අන්දමින් පෙනී සිටින ස්තුති පත්‍රිකාය. ඒ සේරටම වඩා වටින්නේ මංගල දිනයට පෙර ගන්නා අති විශාල මුදලක් වියදම් වන pre shoot හෙවත් පෙර ඡායාරූප ගැනීමය. ඒ වෙනුවෙන් ඇඳීමට ඇඳුම් හදා ගැනීමට මංගල ඇඳුමට වඩා වියදම් යන බව ප්‍රසිද්ධ කරුණකි. ඇතැම් දෙනා මේ වෙනුවෙන්ම පිට රටකටද යන්නේ තමන් පෙර ගත කළ ජීවිතය වඩා හොඳින් විද්‍යමාන කිරීමට ‍වන්නට ඇත. එහෙත් pre shootඑකට හැර ඒ රටට මීට පෙර නොගිය අයද පෙර ජීවිතය විද්‍යමාන කිරීමට තැත් දැරීමද වෙනම කතාවකි.

මේ කතා සියල්ල අතරේ පැවසිය යුතු එක දෙයක් ඇත. එනම් තරුණ විය යනු ෆැෂන්, ට්‍රෙන්ඩ් සමග මෝඩකම් මෙන්ම නුවණක්කාරකම්ද එකසේ මිශ්‍රවන අවධියක් බවය. කර ඇත්තේ මෝඩකම්ද, නුවණක්කාරකම්ද යන්න තීරණය කරන්නේ මැදි විය හෝ මහලු වියය. එහෙත් ඉහත කී සියල්ල තරුණ විය හා සම්මිශ්‍ර වූයේ නැතිනම් ඒ තරුණ වියෙන්ද වැඩක් නැත.

මේ සියල්ල විවේචනාත්මක ස්වරයෙන් කීවද මේවා කරන්න එපා යැයි ඔබට කියන්නේ නැත. හැබැයි එක දෙයක් නම් කිව යුතුය. වෙඩිංඑක දවසේ නටන්නට හිතනවා නම් තමන් ගැන ස්වයං විවේචනයක් පවත්වා ගැනීම යහපත්ය. එහෙම බැරි නම් කල් තියා පුරුදු වීම පසුකාලීනව ඇති විය හැකි මරණීය ලැජ්ජාවකින් ඔබව ගලවා ගනු ඇත.

-ටිරෝනි වෑවලගේ

Chamu Sriගෙයි, පියුමිගෙයි අලුත් වීඩියෝවේ Photos ලීක් වෙයි.


චමු ශ්‍රී කියන්නේ කවුද කියලා කට්ටියට අමුතුවෙන් රචනා ලියන්න ඕනේ නෑ නේ. ඉරාජ්ගේ රැල්ලෙන් පස්සෙන් අඩ නිරුවත් දර්ශන සහිත පෙරළිකාර මියුසික් වීඩියෝ කරන ඊළඟ ලැයිස්තුවේ උඩින්ම ඉන්නේ මොහුයි.

ප්‍රේම සටන සහ ක්ලියෝපැට්රා මියුසික් වීඩියෝ දෙක හරහා අතිශය ජනප්‍රිය වෙච්ච පියුමි ශ්‍රීනායක චමු ශ්‍රී ගේ මීළඟ මියුසික් වීඩියෝවට කැමති වෙන්න කළින් ගොඩක් බය වෙලා තියෙනවාලු. මොකද ඒ තරම්ම ඒක පෙරළිකාර වීඩියෝවක්ලු.

ආරංචියේ හැටියට නම් ලංකාවේ කිසිම මියුසික් වීඩියෝවක මේ වගේ දෙයක් කරලා නැහැලු. මේකේ කතාව, සින්දුව සහ වීඩියෝව වෙනස් කියන වචනයට සාධාරණයක් කරනවලු.

දැනටමත් මේකේ Photos වගයක් ලීක් වෙලා තියෙනවා. ඒවා දැක්කම නම් එක දවසින් YouTube එකේ නම්බර් 1 වෙයි කියලා අපිටත් හිතෙනවා.

පියුමි කියන විදියට මේ වීඩියෝ එක දැකලා කට්ටිය එයාට අනිවාර්යෙන් බනිනවලු.








පාසල් සිසුවියක් ක්‍රීඩා පුහුණු වෙද්දී කාමරයක් තුල සමෘද්ධි නිලධාරියා කරපු නොහොබිනා වැඩක් දුරදිග යයි.


පාසල් සිසුවියක් ක්‍රීඩා පුහුණුවීම් වල නිරතවී සිටින අතරවාරයේ ඇයව සිපගත් බවට සැකපිට සමෘද්ධි නිලධාරියෙකු අත්අඩංගුවට ගෙන තිබෙනවා.

යාපනය, මණ්ඩතිව් ප්‍රදේශයේ පදිංචි 13 හැවිරිදි පාසල් සිසුවියක් මෙම සිදුවීමට මුහුණ පා ඇති බවයි වාර්තා වන්නේ.

සැකකාර සමෘද්ධි නිලධාරිය පෙරේදා (19) යාපනය පොලීසිය විසින් අත්අඩංගුවට ගෙන ඇති අතර එයට විරෝධය පාමින් සමෘද්ධි නිලධාරීන් පිරිසක් ඊයේ (20) දින විරෝධතාවක් සංවිධානයකර ඇති බව අප වාර්තාකරු සඳහන් කළා.

ආදාල සිසුවියට පසුගිය 12 වනදා මණ්ඩතිව්, ඒ- ග්‍රාමසේවා වසමේ පදිංචි සමෘද්ධි නිලධාරිවරයා විසින් ක්‍රීඩා පුහුණු කටයුත්තකට පැමිණෙන ලෙස දැනුම් දී තිබෙනවා.

සිසුවිය එදින පැමිණිමෙන් පසුව මණ්ඩතිව් ක්‍රීඩාංගනයේ පිහිටි කාමරයක් තුලදී මෙම සිප ගැනීම සිදුකර ඇති බවයි තොරතුරු වාර්තා වන්නේ.

අදාල සිදුවීමෙන් පසුව එම සිසුවිය විසින් මේ පිළිබඳව දෙමාපියන් දැනුවත් කර ඇති අතර අනතුරුව මණ්ඩතිව් ප්‍රදේශීය ලේකම්වරයාට මේ සම්බන්ධයෙන් දැනුම් දී තිබෙනවා.

එහිදී ප්‍රාදේශීය ලේකම්වරයා පවසා ඇත්තේ පොලීසියට පැමිණිල්ලක් ඉදිරිපත් කරන ලෙසටත් අදාල සිදුවීම සම්බන්ධයෙන් කාර්යාල මට්ටමින් පරික්ෂණයක් සිදුකරන බවටයි.

සිසුවියගේ දෙමාපියන් විසින් පොලිසියට පැමිණිල්ලක් සිදුකිරීමෙන් අනතුරුව පරික්ෂණ සිදු කළ පොලීසිය ඊයේ සවස සැකකාර සමෘද්ධි නිලධාරියා අත්අඩංගුවට ගෙන තිබෙනවා.

'ඉරාජ්ගේ අලුත් මියුසික් වීඩියෝව වෙනුවෙන් මම නිරුවත් වුණා' - පියුමි හංසමාලි


ඉරාජ්ගේ මියුසික් වීඩියෝ ගැන ගොඩක් අය විවිධ අදහස් ඉදිරිපත් කළානේ.

ඒවගේ මියුසික් වීඩියෝ එකක් ඉරාජ් ආයෙමත් කරන්න යනවාලු.

ඉතින් මේ අලුත් මියුසික් වීඩියෝ එකට රංගනයෙන් දායක වෙන්නේ පියුමි හංසමාලියි.

මේ ඒ ගැන ඇය කියපු කතාව.



කට්ටිය මේ දවස්වල පිස්සුවෙන් වගේ ආදරේ කරන කෙල්ලගේ ඇත්ත.


ශලනි ප්‍රනාන්දු කියන්නේ කලා ලෝකයට පායා එන අලුත් තරුවක්. දවෛනි ඉනිමේ චූටි මැණිකේ එහෙම නැත්නම් ලිහිනි කිව්වාම දැන් ඈ ගැන කවුරුත් දන්නවා. 2017 දෙරණ අවුරුදු කුමරිය වූ ඇය පළමු වතාවටයි “ මේ විදියට පාඨකයන් හමුවට එන්නේත්.


  • 2017 දෙරණ අවුරුදු කුමරිය හරහා කරළියට ආපු ශලිනි ප්‍රනාන්දුට චූටි මැණිකේ වෙන්න අවස්ථාව ලැබුණේ කොහොමද කියලා මුලින්ම කිව්වොත්?

2017 දෙරණ අවුරුදු කුමරිය විදිහට අභිෂේක ලැබිමම තමයි මට චූටි මැණිකේ වෙන්න අවස්ථාව ලබා දුන්නේ. එහෙම නොවුණා නම් මගේ ගමන මීට වඩා වෙනස් වෙන්නත් ඉඩ තිබුණා. කවදාවත් ප්‍රසිද්ධියේ රඟපාලා මම හා පුරා කියලා නොතිබුණු රඟපෑවේත් ඔය කියන දෙවැනි ඉනිමේ චූටි මැණිකේ කියන චරිතයම තමයි.


  • කොහොමද මේ දවස්වල චූටි මැණිකේට ලැබෙන ප්‍රතිචාර?

මගේ රඟපෑමට මේ තරම් හොඳ ප්‍රතිචාර ලැබෙයි කියලා මම හීනෙකින්වත් හිතුවේ නැහැ. පුංචි චරිතයක් රඟපෑවත් මගේ චරිතේ ගැන ගොඩක් දෙනා කතා කරනවා. මට සුබ පතනවා. ඒ වගේම චූටි මැණිකේගේ අහිංසක කමටත් ගොඩක් දෙනා ආදරේ කරනවා. හිතාගන්න බැරි සතුටක් තමයි මේ හැම දෙයක් නිසාම මට දැනෙන්නේ.


  • අවුරුදු කුමාරි තරගෙට ආපු ශලනිට නිළියක් වෙන්න ලැබිලා මුලින්ම කැමරාව ඉස්සරහට ගියාම මොකද හිතුණේ?

මම රංගනය ගැන කිසිම හැදෑරීමක් කරලා තිබුණේ නැහැ. ඒ නිසා පළමු දවසේ කැමරාව ඉස්සරහට යනකොට ලොකු බයක් දැනුනා. මගේ බය දැකපු දෙවැනි ඉනිමේ සියලු දෙනාම මාව දිරිමත් කළා. නළු නිළියන් වගේම නිෂ්පාදන කණ්ඩායමෙනුත් විශාල සහයක් ලැබුණා. ඒ නිසා තමයි අද මම මේ විදියට හැමෝම කතා කරන රංගන ශිල්පිණියක් වුණේ.


  • චූටි මැණිකේ කියන චරිතය ශමල්කාවයි, දෙව්මිවයි, පසුකර ඉදිරියට යාවිද කියලා අන්තර්ජාලයේ හුවමාරු වෙන සටහන ගැන ඔබ මොකද කියන්නේ

ඒක තීරණය කරන්න ඕනේ මගේ ආදරණීය ප්‍රේක්ෂකයෝ. ලැබෙන ප්‍රතිචාර අනුව නම් චූටි මැණිකේ කියන චරිතය ටිකෙන් ටික මිනිස්සු අතරට ගිහින් කියලා හිතෙනවා.


  • ඔබ පෞද්ගලිකව දවෛනි ඉනිමේ වැඩිපුරම කැමති චරිත මොනවාද කියලා ඇහුවොත්?

පිරිමි ළමයින්ගෙන් මම වැඩිපුරම කැමති අනුහස්ටයි. ඒ වගේම චබිටයි. එතකොට ගැහැනු ළමයින්ගෙන් ශමල්කාටයි දෙව්මිටයි මං හරිම කැමතියි.


  • ශලිනිගේ අනාගත බලා‍පොරොත්තුවත් රංගන ශිල්පිණියක් විදියට දිගටම රැඳී සිටීමද?

ෆැෂන් ඩිසයිනර් කෙනෙක් වීම තමයි ලොකුම බලා‍පොරොත්තුව. මම ඒ පැත්තෙන් තමයි මගේ අධ්‍යාපන කටයුතු වුණත් කරගෙන යන්නේ. ඒත් ඒ හැම දෙයක්ම අතහැරලා ශලිනි ඉදිරියේදි වෘත්තීය රංගන ශිල්පිනියක් වෙන්නත් පුළුවන්. හැබැයි තවම ඒක තීරණය කරන්න කල් මදි.


  • පෞද්ගලික ජීවිතයේත් ඔබ චූටි මැණිකේ තරම් අහිංසකද?

චූටි මැණිකේ නම් හරි නිහඬ චරිතයක්. ඒත් ශලිනි නම් ඒ තරම් නිහඬත් නැහැ. ඒ තරම් අහිංසකත් නැහැ (හිනා)


  • ඔබේ පෞද්ගලික ජීවිතය ගැන කතා කළොත්?

මගේ ශක්තිය මගේ අම්මයි, අයියයි. මම කොහේ ගියත් අම්මා මගේ පිටිපස්සෙන් ඉන්නවා. තාත්තා ජීවතුන් අතර නැති වුණත් තාත්තාගේ ආශීර්වාදය මට හැමදාකම ලැබෙනවා කියලා මම විශ්වාස කරනවා. මට තවම වයස 19යි. අපි දැනට පදිංචි වෙලා ඉන්නේ මීගමුවේ.

(සමන්මලී නැලිගම)

නිළියක් ඩොනල්ඩ් ට්‍රම්ප් ගැන ලොකු රහසක් හෙළි කරයි.

සල්මා හෙයෙක් ඇත්ත කතා කරන්නට බිය නොවන නිළියක්. ඇය මෑතකදී, මෙතෙක් ලොවට හෙළි නොවූ රහසක් හෙළිකර තිබුණා. ඒ, වත්මන් ඇමෙරිකානු ජනාධිපති ඩොනල්ඩ් ට්‍රම්ප් පිළිබඳවයි.

“මට එයාව මුණ ගැහුණේ ජනාධිපති ධුරයට පත්වෙන්න කලින්. එතකොට මට පෙම්වතෙක් හිටියා. මුණ ගැහුණු මුල්ම වතාවෙදිම එයාට ඕනැ වුණා, මගේ මිතුරෙක් වෙන්න. මගේ ගෙදර ෆෝන් නම්බර් එකත් ඉල්ලා ගත්තා. මාත් එක්ක කොහේ හරි ගිහින් කතාබහ කරන්නත් එයා බලාපොරොත්තු වුණා.” සල්මා මේ කතාව කීවේ, ඇමෙරිකානු ගුවන් විදුලි චැනලයක වැඩ සටහනකට එක්වෙමින්.

දැන් ඇගේ කතාව සමාජ වෙබ් අඩවිවලටත් යොමු වී තිබෙනවා. සල්මා පවසන්නේ ඩොනල්ඩ් ට්‍රම්ප් ඇමෙරිකානු ජනාධිපති ධුරයට පත්වනු ඇති බවට තමන් තුළ විශ්වාසයක් තිබුණු බවයි. මෙක්සිකානු සහ හොලිවුඩ් සිනමා නිළියක වන සල්මා තවත් අදහසක් ප්‍රකාශ කළේ මේ අයුරින්… “ඩොනල්ඩ් ට්‍රම්ප් මෙක්සිකෝ දේශ සීමාවේ තාප්පයක් ඉදිකරන්න යනවා. මම නම් හිතන්නේ එයාට ඒක කරන්න බැරි වේවි කියලයි.”

දවස් 5ට මම 5 දෙනෙක් තියාගන්නවා, weekend අවංක කෙනා එක්ක – නිළියක් කියලා.


ලාංකීය සිනමාවේ නළු නිළියන් අතර වඩාත්ම ජනප්‍රිය පුද්ගලයා බවට පත්ව සිටින සුනිල් ටී ඔහුගේ ජීවිතයේ ආදරය, විවාහය ගැන වගේම නළු නිළියන් ගැන එක්තරා පුවත්පතකට මෙහෙම දෙයක් කියලා තිබුණා.

අද සමහර අලුත් නිළියන් ගැන කතා හැදෙන්නේ ඇයි? ඔවුන් මුදල් හම්බ කරන්න විවිධ වැඩ කරනවාද?

මම තරම් නිළියෝ ක්ෂේත්‍රයට හඳුන්වා දුන්න නිෂ්පාදකයෙක් නැති තරම්. ‘‘ජීවිතේ ලස්සනයි’’ කියලා මම හැදූ චිත්‍රපටයෙන් අලුත් නිළියන් 4 දෙනෙක් සිනමාවට හඳුන්වා දුන්නා. ඒ නිළියෝ එතකොට අවේ බස්වල. සමහරු බොහොම දුප්පත්. චිත්‍රපටය ඉවරවෙන්න කලින් 4 දෙනාම කාර් ගත්තා. මට හරි ආඩම්බරයි. ඒ අය කාර් ගත්ත විදිහ මට වැඩක් නෑ. අද ඒ 4 දෙනාම හොඳ තත්ත්වයක ඉන්නවා. සමහරු කියනවා, මේ අය අනවශ්‍ය දේවල් කරලා සල්ලි හම්බ කරනවා කියලා. සමහර විට එහෙම වෙන්නත් පුළුවන්. නොවෙන්නත් පුළුවන්.ඒ 4 දෙනාගෙන් එක නිළියෙක් මට දවසක් අපූරු කතාවක් කිව්වා. මම ඇහැව්වා, ඔයාට මොනවද තිබෙන ප්‍රශ්න කියලා. ප්‍රශ්න නම් ගොඩක් තිබෙනවා. මම ඒවාට මුහුණ දෙනවා කියලා. කොහොමද කරන්නේ කියලා ඇහුවාම සතියේ දවස් 5ට මම බෝයි ෆ්‍රෙන්ඩ්ස්ලා 5 දෙනෙක් තියාගන්නවා කිව්වා. ඒ 5 දෙනාට ටෙලිෆෝන් නොම්බර 5ක් දෙනවා. හැබැයි ඒ 5 දෙනා ලොකු සල්ලිකාරයෝ. සෙනසුරාදා හා ඉරිදා අවංක බෝයිෆ්‍රෙන්ඩ් තියාගන්නවා. එයාට වෙනම නොම්බරයක් දෙනවා. මේ අර නිළිය කිව්ව කතාව. ඔහොම තමයි එයා ජීවිතේ ගෙනියන්නේ. අපට හැමද‌ාම ෆන්ෂන් තිබෙනවා. පාටි තිබෙනවා. ඒවාට සල්ලි තියෙන්න ඕනෑ. අපි ජනප්‍රිය වෙන්න වෙන්න පුදුම ඩිමාන්ඩ් එකක් තිබෙන්නෙ. ඉතිං බෝයි ​ෆ්‍රෙන්ඩ්ලා අතදිගහැර අපට වියදම් කරනවා. එයා හොඳ ළමයෙක්. නමුත් මේ සමාජය මගින් ඇය නරකට යොමුකරලා. ජනප්‍රිය වීම නිසා මේ තත්ත්වය හරියට මේන්ටේන් කරන්න වෙනවා. එතකොට සල්ලි ඕනෑ, කාර් එකක් ඕනෑ. ඉතිං අයියේ මම වැරැදිද කියන්න. මම කිව්වා, නංගි ඔයා හරි. කල්පනාවෙන් යන්න. 5 දෙනා එක දවසට හම්බවුණු දවසට ඉවරයි. බෝයි​ෙෆ්‍රන්ඩ්ට අසුවුණොත් එ්කත් ඉවරයි කියලා.මේ අලුත් නිළියන් බඳින්න කැමැත්තක් නෑ. සමහරු නම් ඉක්මනින් බඳිනවා. බැඳලා අයින් වෙනවා. මම ගෙනා අනර්කලී දැන් ඒ විදිහට තමයි ඉන්නේ. ඇය විවාහ වෙලා දැන් ඇමරිකාවේ ඉන්නේ. ඒ වගේ ඔලුව කල්පනා කරලා වැඩකරන නිළියන් අඩුයි. සල්ලි හොය හොයා යනවා. බඳින්නේ නෑ. බඳින්න එන අයත් දැන් අඩුයි. මේ හැමදේටම මුල මුදල්. සමහරු ගණිකාවන් බවට පත්වෙන්නෙත් ඔය තත්ත්වය හින්දමයි.

කිරි කවඩියේ දුගී බව නැති කරමු!


ස්කොට්ලන්තය, ‘පීරියඩ් පවර්ටි’ හෙවත් ‘ආර්තව දුගී බව’ මුලිනුපුටා දැමූ ලෝකයේ පළමු රට බවට පත්විය. ඔවුන් මේ ජයග්‍රහණය වාර්තා කරන්නේ මාස හයක් තිස්සේ දුගී කාන්තාවන් සඳහා සනීපාරක්ෂක තුවා (sanitary towels/pads/products) නොමිලේ සැපයීමේ නියමු ව්‍යාපෘතියක් සාර්ථකව නිම කිරීමත් සමගිනි. දැන් ඔබට, මේ කුමන හරුපයක්දැයි සිතෙන්නට ඇත.! කමක් නැත! එහි පුදුමයක් නැත!!

මේ කතා කරන්නේ කාන්තාවන්ට සෑම දින 28කටම වරක් සොබාදහම විසින් පනවා ඇති සොඳුරු දඬුවම ගැන ය. සෑම දින 28කට වරක් ඇයව මව් පදවියට සූදානම් කිරීම පිණිස පරිණාමය විසින් පනවා ඇති සොබාදහමේ වේදනාකාරී නීතිය ගැන ය. ඒ සොබාදහමේ දඬුවම හෝ නීතිය තුළ ඇය මසකට වරක් ආර්තවයට ලක්වන්නීය. එවිට දෙකලවා අතරින් රුධිර ධාරා ගලන්නේය. යටිබඩ වේදනා ගෙන දෙන්නේය. මෙවිට ඇය ඇගේ නිරෝගී බව හඟවමින් ගර්භාෂයේ බිත්තිවල තිබෙන ‘නෙක්රොබයොසිස්’ තත්වයට ලක්වූ හෙවත් ස්වභාවිකව මැරුණු පටක, ලේ ධාරා සමග පිට කළ යුතු වන්නීය. ඉතා සම්ප්‍රදායික බසින් පවසන්නේ නම් මසකට වරක් ඈ ‘ගෙට වන්නී’ය. ඊනියා සුචරිතවාදීන්ගේ බසින් කියනවා නම්, ‘කිල්ලට’ හසුවන්නීය.

ලංකාවේ මෙසේ කිළි වැදුණු ගැහැනියකට දින හතක් ගත වන තෙක් සාස්තරයක් පොරොන්දමක්වත් බලන්නට බැරිය. යන දේවාලයකට යන්නට බැරිය. ඒ ඇය අපිරිසිදු නිසා ය.! කිල්ල නැතත් දළදා මාළිගාවේ පත්තිරිප්පුවට යන්නට ලංකාවේ ගැහැනියකට කොහෙත්ම බැරි නිසා ඒ ගැන කතා කිරීමෙන් පලක්ම නැත. බාගවිට එදා දන්ත කුමරු සමග මාස ගණනක් තිස්සේ කෙස්සේ හංගාගෙන දන්ත ධාතුව ගෙන ආ හේමමාලාට ඒ මාස ගණනේම ඔසප් නොවුණා විය යුතුය...!!

මසකට වරක් කාන්තාවක් මුහුණපාන මේ ඉතා ස්වභාවික සංසිද්ධිය සහ ඒ නිසා ඇය මාසයකට අඩුම වශයෙන් දින 3ක් බැගින්වත් දරා සිටින කායික හා මානසික පීඩාව, ලංකා සමාජයේ ‘ගොම ගතියෙන් යුත් බහුතරයට’ ‘පට්ටා ජෝක් එක’කි. එහිදී කාන්තාවක් ලෙස උපත ලැබීම ඇගේ තෝරාගැනීමක් නොවන බවත්, ඒ නිසා මේ ‘අපහසුතාවය’ ඇයට උරුම එකක් බවත්, ඇය ප්‍රශ්න නොනගා ‘තියෙන හැටියකට’ එය දරාගත යුතු බවත් අපි සිතමු. මේ ‘තියෙන හැටියට දරා ගැනීම’ යන්නට, සනීපාරක්ෂ තුවා භාවිතයේ පටන්, ඒ දිනවලදී ගෙදර අයියාට සහ තාත්තාට වැඩිපුර මුහුණ නොදීමේ පටන්, ලැජ්ජාව පිරුණු කිළිටි රෙදි කඩකින් යටි කය ආවරණය කර ගැනීම දක්වා සියලු දෙයම ඇතුළත් ය.

 අපේ අසල්වැසියා ද එසේය. නමුත් ඉන්දියාවේ සිවිල් සමාජ ව්‍යාපාරය ලංකාවේ එනමින් යුත් මොකක්දෝ එකට වඩා ඉතා ප්‍රබල හෙයින්, ඔවුහු මේ ගැන විවෘතව කතා කළහ. උදාහරණක් වශයෙන් ඉන්දියාවෙන් මීට මාස කිහිපයකට පෙර වාර්තා වූයේ ‘රුධිර පැල්ලම් බද්ද’ නැති කිරීමට නව නීති ගෙන ආ බවයි. එහි අර්ථය වූයේ කාන්තාවන්ගේ සනීපාරක්ෂක නිෂ්පාදනවලට රජය බදු අය නොකළ යුතු බවයි. ගැහැනුන්ගේ රුධිර බද්දෙන් ආණ්ඩුව මුදල් හම්බ කළ යුතු නැති බවයි. එය ‘ලැජ්ජා නැති වැඩක්’ බව ඔවුහු එළිපිට කීහ. ඒ අනුව සනීපාරක්ෂක නිෂ්පාදනවල මිල පහත හෙළිණි. අද වන විට වාර්තා වන්නේ කාන්තාවන්ගේ ගැබ්ගෙළ පිළිකා අවදානම හඳුනාගැනීම සඳහා ඔවුන් ඔසප් සමයේදී පාවිච්චි කර ඉවත දමන ‘අපිරිසිදු’ පෑඩ්ස් සහ රෙදිකැබලි එකතු කිරීමේ මධ්‍යස්ථාන පවා ඉන්දියාව පුරා ඇතිවෙමින් තිබෙනා බවයි. ඒවායින් ලබාගන්නා ඩීඑන්ඒ සාම්පල ඇසුරින් මෙම ගැබ්ගෙළ පිළිකා පරීක්ෂණ සිදුකෙරෙනු ඇත.

ආර්තව දුගී බව මේ වන විට ලෝක පරිමාණයෙන් නැගෙන හඬකි. එය ඇමරිකා එක්සත් ජනපදයේ පටන්  යුරෝපාකරය හරහා නේපාලය දක්වාම ඇතිවූ සංවාදයකි. සමානාත්මතාවය ගැන දෙසූ බුදුන් උපන් නේපාලය, මේ වන විට හද්දා හින්දු රටක් වන අතර, ඒ සංස්කෘතිය තුළ මාසික ඔසප් දිනවලදී ගැහැනුන්ව ගෙදරින් පන්නා දැමේ. ඔවුන් ඒ දින කිහිපය ගත කළ යුතු වන්නේ නිවස අසල හෝ නිවස පෙනෙන මානයෙන් පිහිටි ‘ඔසප් මඩුව’ක ය. ඒ ඔසප් මඩුව බොහෝ විට හරක් ගාලකි. එනම්, ඇගේ නිවසේ ජීවත් වන දෙපා හරකුන් නිසා ඇය රැය පහන් කරන්නේ පිදුරු ගොඩක ය. විටෙක සිව්පා හරක් පැමිණ ඇයව පාගාගෙන යති. සල්ලාලයෝ ඒවාට රිංගා ඇයට අතවර කරති. ඔසප් සමයේ ලිංගික සබඳතා පැවැත්වීමෙන් ගැහැනිය ගැබ් නොගන්නා බව දන්නා නිසා දෙපා තිරිසනුන්ට මෙය බෝනස් එකකි. ඔසප් මඩුවල රැය පහන් කරන නේපාල දැරියන් සර්පයන් දෂ්ට කිරීමෙන් මිය ගිය අවස්ථා ද මේ අතර අසන්නට ලැබේ. දැරියන් පමණක් නොව දරුවන් සිටින ගැහැනුන්ට ද ඒ ඉරණම ම ය. ඔවුහු අතදරුවන් ද කිහිල්ලේ ගසාගෙන මේ ඔසප් මඩුවලට මසකට වරක් යති. හේතුව? ඇය සිටියහොත් ඇගේ කිල්ල නිසා දෙවියන්ට ගෙදර පහන පත්තු කරන්නට බැරි වන නිසා ය.! එපමණක් නොව මේ කාලය තුළ ඔවුන්ට කිරි ආහාර තහනම් ය. එළවළුවක් පවා ස්පර්ශ කරන්නට තහනම් ය. ඒ ඔවුන් ‘කිළිටි’ නිසාය! කාන්තාවන් ඔසප් මඩුවලට දක්කන මේ චාරිත්‍රයට කියන්නේ ‘චහුපාදි’ කියා ය. නේපාල ශ්‍රේෂ්ඨාධිකරණය මේ චහුපාදිය තහනම් කළේ 2005 වසරේ ය. 2008 වසර වන විට නේපාලය මේ සිරිත රටෙන් මුලිනුපුටා දමමියි කියා මාර්ගෝපදේශන මාලාවක් නිකුත් කළේය. නමුත් නේපාලයේ පිටිසර ගැහැනුන්ගෙන් 70%ක්ම මේ ලියන මොහොතේදීත් ඔසප් සමයේ රැය පහන් කරන්නේ හරක් මඩුවල ය.

සරස්වතිය කෝප වේ යැයි කියා නේපාලයේ ඇතැම් පළාත්වල දැරියන්ට මේ දින කිහිපයේදී පොතක් පතක් ඇල්ලීමත් තහනම් ය. ඉස්කෝලේ යාමක් කොහෙත්ම නැත. පාසල් ගියත් ඔවුන්ට අන්දවා යවන්නට දුප්පත් රෙදි කඩක් හැර සනීපාරක්ෂක තුවායක් අම්මලාට නැත. ඒවා බැහැර කළ හැකි ක්‍රමයක් පාසල්වල කොහෙත්ම නැත. මේ අතර පසුගිය ජූලි මාසයේ වාර්තා වුණේ තමිල්නාඩුවේ 12 හැවිරිදි පාසල් දැරියක්, සිය ඇඳුෙම් ගෑවුණු රුධිර පැල්ලමක් දැක පන්තියේ නරුම ගුරුවරිය කළ කී දේවල් නිසා සිත් තැවුලට පත්ව සියදිවි නසාගත් බවයි. මේ නරුම ගැහැනිය මිශ්‍ර පන්තියක සිටි ඉගෙන ගනිමින් සිසුවියගේ ෂල්වාරය ඉහළට ඔසවා පෙන්නන්නට කියා” “පෑඩ් එකක් ගෙනාවේ නැතිනම් මේක තියාගන්නවා” යැයි කියමින් කළු ලෑල්ල මකන ඩස්ටරය ඇයට දිගු කර තිබිණි!! සංඛ්‍යාලේඛනවලට අනුව මෙවැනි නරුම කම් සහ ලැජ්ජාවන් ඉවසනු නොහී ඉන්දියාවේ දැරියෝ වසරකට අවම වශයෙන් තුන්දහස බැගින්වත් සිය පාසල් ගමන අතරමග නතර කරති.

මේ සියල්ල අතරේ ලංකාවේ තත්වය කෙබඳුද..? එම විග්‍රහය ආරම්භ කළ යුතු වන්නේ ලංකාවේ පාසල් දැරිය ඔසප් වීම ආරම්භ කළ දිනයේ පටන්, එනම් ඇය වැඩිවිය පැමිණි දිනයේ පටන් පවතින තත්වයෙනි. මේ ලංකාවේ අගනගරයෙන් සැතපුම් සිය ගණන් ඈත පිහිටි මිශ්‍ර පාසලකින් අදත් ඇසෙන සංවාදයකි.

“අමරාවතී ජම්බු ගහෙන් පැනල!”



“පැනල නෙවෙයි බං” වැටිල!”

“ඒ වුණාට මැරෙන එකක් නෑ බං, අමරාවතීනෙ..”

කොල්ලෝ කොක්සන් දෙති. පාහර කමකින් සිනාසෙති. ඔවුන්ගේ නිමිත්ත ‘ගැහැණු නිමිත්ත’ ය. පන්තියේ ගැහැණු ළමයෙකු පාසල් වේලාවේදී වැඩිවිය පැමිණීම ය. පන්තියේ පමණක් නොව සකල පාසලේම එදින ‘නිව්ස් එක’ එයයි. ගුරුවරියෝ වටවී නළලේ අත් ගසා ගන්නා හැටි පෙනේ. ‘මේ මොන මළ කරදයක්ද’ හෝ ‘මේකි මේක ඉස්කෝලෙදිම කරගත්තනෙ” වැනි කරදරකාරී හැඟීමක් ඔවුන්ගේ මුහුණුවල ලියැවී තිබේ. “සර් කෙනෙක්වත් දැක්කොත් ඉවරයි” යැයි ගෝලු ගන්නා සුචරිතවාදී ගැහැනු ද මේ අතර වෙති.

මේ ගෝත්‍රික කුතුහලය කුමක්ද? ගැහැනු ළමුන් යනු පිරිමි ළමුන්ට අමුතු සත්ව කොට්ඨාසයකි. පිරිමි ළමුන් යනු ගැහැනු ළමුන්ට තනිකරම සත්ව කොට්ඨාසකි. කුඩා කල පටන්ම ලිංගික අධ්‍යාපනයක් නැතිව, සෞඛ්‍යය විෂය නිර්දේශයට තිබෙන ප්‍රජනනය පාඩමත් ‘ගෙදර ගිහින් හිමීට කියවාගන්න” යැයි සෞඛ්‍ය මිස් අහක බලාගෙන කියන රටක විසි එක් වන සියවසේදී මේ තත්වය හැර වෙනත් ප්‍රාතිහාර්යයක් බලාපොරොත්තු විය හැකිද? ගැහැනු ළමුන් සහ පිරිමි ළමුන් තනිකරම වෙනස් ලෝක දෙකක වෙන් කර ඇතිදැඩි වන මේ රටේ, පිරිමි ළමෝ අවුරුදු හත අට වනවිට ‘බ්ලූ’ බැලීම ආරම්භ කරති. මේ අතර ගැහැනු ළමෝ...?

මහින්ද ප්‍රසාද් මස්ඉඹුල ලියූ සෙංකොට්ටං නවකතාවේ පසුකවරයේ සඳහන් වන මාගල්ලවත්තේ වංසාරිදී කිරිඅම්මාගේ ඔවදනෙන් කොටසක් මෙසේ ය. “.... ඔය පිරිමි ජාතිය මහ අමුතු ජාතියක්.. අන්න ඒ හින්ද උඹ ළඟ තියෙන ඔය හක්ගෙඩි දෙකයි පංච බෙල්ලයි විතරක් උන්ගෙ නොහොබිනාකම්වලට පරිහරණය කරන්න දෙන්න එපාය..”! 

අද පවා ලාංකීය සමාජයේ හද්දා පිටිසර පමණක් නොව, උගත් යැයි කියන පහළ මධ්‍යම පන්තියේ පවුල් අතර පවා ගැහැණු කම හා පිරිමි කම අතර ඇතිකර තිබෙන විසංවාදයේ තරම කෙතරම් ද යත්, පෙර කී ‘ඊනියා ආච්චිලා’ කෙල්ලන්ට කියා දී තිබෙන්නේ ‘ඒවා ඒ ඒ විදිහට-ඒ ඒ වෙලාවට-අවස්ස ආකාරයට සිද්ද වෙනවාය, ඒ නිසා අනවස්ස දේවල් අහන්ට එපාය, ඒ වෙලාවට අවනත වෙලා උඩ බලාගෙන හිටු” කියා ය. මේ නිසා අදටත් සමහර ගම්බද යුවතියන් දරුවා ලැබෙන තෙක්ම ඒකා එළියට එන්නේ යෝනි මාර්ගයෙන් ද නැත්නම් ගුද මාර්ගයෙන් ද කියා දන්නේ නැත.!! මේ තත්වය ඔබට විශ්වාස කරන්නට අමාරු නම්, ග්‍රාමීය රෝහලක ප්‍රසුතිකාගාරයේ දිගු සේවා කාලයක් හිමි අවංක හෙදියකගෙන් හෙමීට මේ ගැන අසන්න. කෙසේ නමුත් ගම්වල මේ තත්වයට ආච්චිලා කියන්නේ ‘හැදිච්ච කම’ කියා ය.!

සාමාන්‍යයෙන් මේ ‘මාර හැදියාවකින් යුක්ත සංස්කෘතිය’ තුළ ගැහැනු ළමයෙක් වැඩිවිය පැමිණි පසු නැන්දලා, කිරි අම්මලා, ලොකු අම්මලා, ආච්චිලා වටවී “කෙල්ලෙ අද ඉඳන් කැන්දගෙන යනකල් පරිස්සම් වෙයල්ලා“ යැයි කියති. දැන් මේ පරිස්සම් කරගන්නට කියන්නේ අහවල් පංචා බෙල්ලෙක්ද? එකී අහවල් දෙය විවාහය දක්වා පරිස්සම් කර ගත යුත්තේ කාගෙන්ද? පිරිමින්ගෙනි. ඉන්පසු පෙර කී අහවල් දේ පරිස්සම් කරන්නට බෙර වයා - තාල නටා අවසානයේ භාරදෙන්නේ ද එතෙක් කල් ඈතින් තබාගත යුතු යැයි කී පිරිමියෙකුට ය.! විටෙක ඉන්පසු එක වහලක් යටදී එකතු වන්නේ එතෙක් කල් සපුරා වෙනස් ලෝක දෙකක ඇතිදැඩි කළ මද කිපුණු වස්සෙක් සහ මෙලෝ සංසාරයක් නොදන්නා වැස්සියකි!! ඇත්තෙන්ම මේ ලොජික් එකේ ලොකු අවුලක් තිබේ.

මේ රටේ පාසලකදී ගැහැණු ළමයෙක් වැඩිවියට පත්වීම පමණක් නොව, මාසික ඔසප් දිනයේදී ඇගේ සුදු ගවොමේ රුධිර පැල්ලමක් තැවරීම පවා කොල්ලන්ට තලු මරන්නට හේතු සාධක සැපයීම සහ කෙල්ලට එය ජීවිත කාලයටම අමිහිරි අත්දැකීමක් බවට පත්වීම අරුමයක් නොවන්නේ ද මේ අවුල නිසා ය. යම් හෙයකින් ස්කොට්ලන්තයේදී සිදුවුණාක් මෙන් ලංකාවේ ද නොමිලේ සනීපාරක්ෂක තුවා සපයන සංකල්පයක් හෝ වැඩසටහනක් අනාගතයේදී ක්‍රියාත්මක කරන්නේ නම් එය අනිවාර්යයෙන්ම ආරම්භ කළ යුත්තේ පාසලෙනි. එසේ ආරම්භ කරන්නේ නම් හෙවත් ලංකාව තුළ ‘පීරියඩ් පවර්ටි’/ආර්තව දුගී බව පිටුදැකීම වැනි අගනා සංකල්පයක් ප්‍රායෝගිකව මහ පොළොවේ හිටවන්නට නම්, ඒ වැඩසටහන තුළ රටේ ලිංගික අධ්‍යාපනයේ තිබෙන මහ අවුල ගැන අනිවාර්යයෙන්ම සංවාද කළ යුතුය. ලංකාවේ සංස්කෘතියේ මුල් ඇද තිබෙන ‘ගෝත්‍රික ගොම ගතිය’ මැකෙන තෙක් කාන්තාවගේ වේදනාකාරී රුධිර පැල්ලම සහ ඇගේ සිතේ එයින් ඇතිවන ලැජ්ජාසහගත කැළල යන දෙකම තවදුරටත් සමාන පද පමණක්ම වනු ඇත.

- ක්‍රිෂාන්ති රාජපක්ෂ

ආසියාවේ නොබෙල් තෑග්ග අපේ දමිළ ගුරු මාතාවකට.

ශ්‍රී ලාංකික දමිළ ගුරු මාතාවකට ආසියාවේ නොබෙල් ත්‍යාගය ලෙස හඳුන්වන 2017 රොමොන් මැග්සේසේ සම්මානය හිමිව තිබේ. මේ සම්මානය ලාංකික දමිළ කාන්තාවකට හිමිවූ දෙවැනි අවස්ථාව මෙයයි. යුද්ධය නිසා පීඩාවට පත්වූ දරුවන් සහ කාන්තාවන්ගේ මානසිකත්වය නඟා සිටුවීමට ඇය සිදුකළ කැපවීම සැලකිල්ලට ගෙන ගිත්සි ෂන්මුගම් ගුරු මාතාවට මේ සම්මානය පුදකර තිබේ. මැග්සේසේ පදනම ඇය හඳුන්වා දී ඇත්තේ සිය දේශයේ දරුවනට සැබෑ මාතාවක වූ තැනැත්තියක ලෙසිනි.

රොමොන් මැග්සේසේ සම්මානය මෙයට පෙර 1958 දී කැනඩාවේ උපත ලබා මෙරටට පැමිණි දමිළ කාන්තාවක වන මේරි රත්නම්හට මුල්වරට හිමිවිය. ඉන්පසු 1959 දී ටාසි විට්ටච්චි පුවත්පත්කලාවේදියාටද, 1969දී ආචාර්ය ඒ.ටී. ආරියරත්න හටද, කලාශූරී මංජු ශ්‍රී හට 1979 දීද මර්සලින් ජයකොඩි පියනම හට 1983 දීද මහාචාර්ය එදිරිවීර සරච්චන්ද්‍රයන්හට 1988 දීද පණ්ඩිත් ඩබ්ලිව්.ඩී. අමරදේව හට 2001 දීද මෙම සම්මානය හිමිව තිබේ. අවසන් වතාවට 2008 දී මනෝ වෛද්‍ය ආනන්ද ගලප්පත්ති මෙම සම්මානයෙන් පිදුම් ලැබුවේය.

මෙම වසරේ ශ්‍රී ලාංකික ගුරුමාතාව සමඟ ජපානයේ යෝෂියා කි ඉෂිකාවා ද ඉන්දුනීසියාවේ අබ්දොන් නඛ්ඛාන්, සිංගප්පූරුවේ ටෝනි ටේ, පිලිපීනයේ අධ්‍යාපන රංග සංවිධානය සහ පිලිපීනයේ ලිලියා ද ලීමා සම්මානයට හිමිකම් ලැබූ අනෙක් පිරිසයි.


දශක තුනක කාලයක් ශ්‍රී ලංකාව තුළ පැවැති යුද්ධය හේතුකොට වැඩියෙන්ම පීඩාවට පත්වූයේ කාන්තාවන් සහ දරුවන්ය. මානසික බිඳවැටීමට ලක්ව සියදිවි නසා ගැනීමේ උත්සාහයන්ට පවා මේ අය යොමුව තිබුණි. යුද්ධය සමයේ මේ අයගේ සිත් පීඩාවන් දුරුකර මනස ගොඩනගා ශක්තිමත්ව සමාජයට මුහුණ දෙන්නට උපකාරී වන සමාජ මනෝවිද්‍යාත්මක උපදේශන ක්‍රම හිඟව තිබුණි. ගිත්සි ෂන්මුගම් ගුරු මාතාව සිය සමාජ සත්කාරය අරඹන්නේ එවන් සමයකය.

බ්‍රිතාන්‍ය ජාතිකයන්ට අයත් තේ වත්තක ලිපිකරුවකුගේ දියණියක ලෙස උපත ලද ගිත්සි පෞද්ගලික කාන්තා පාසලක නේවාසිකව ඉගෙනුම ලැබුවාය. ගුරුවරියක් වීම ඇගේ කුඩා කළ සිටම සිහිනය විය. ඒ අනුව ඇය 1967 කොළඹ ශාන්ත ජෝශප් විද්‍යාලයේ ඉංග්‍රීසි ගුරුවරියක ලෙස කටයුතු ඇරඹුවාය. ඒ කාලයේ මනෝවිද්‍යාව පිළිබඳ උනන්දුවක් ඇතිවූ අතර සුබෝධි ආයතනයට සහ පවුල් සංවිධාන ආයතනයකටද සම්බන්ධ වූවාය. 1983 දී ශාන්ත ජෝශප් විද්‍යාලයෙන් ඉවත්ව පූර්ණකාලීනව මනෝ සමාජීය ආධාර කටයුතු සඳහා ස්වේච්ඡාවෙන් කැපවූවාය. ඇය සේව් ද චිල්ඩ්‍රන් ආයතනයේ ක්‍රියාකාරිනියක් ලෙස යුද්ධයේ තර්ජන සහිත මායිම් ගම්මාන කරා යමින් උපදේශන කටයුතුවල යෙදුණාය. ගුරුවරුන් සහ ස්වේච්ඡා සේවකයන් පුහුණු කළාය.


යුද වැන්දඹුවන්, අනාථයන් සහ යුද කම්පනයෙන් පීඩාවට පත් දරුවන් හට නැවත ජීවිතය ගොඩනගා ගැනීමට උපකාරී වූවාය. යුද්ධයෙන් පසු සේව් ද චිල්ඩ්‍රන් වෙතින් සමුගත්තද ඇය මත්ද්‍රව්‍ය, ගෘහස්ථ හිංසනය, ලිංගික ජාවාරම්වලින් පීඩාවට පත්වන කාන්තාවන් සහ දරුවන් වෙනුවෙන් වූ සංවිධාන සමග එක්ව කටයුතු කළාය. අසාධාරණයට ලක්වූ තරුණ ප්‍රජාව වෙනුවෙන් ඇය තාවකාලික නිවාසයක් පිහිටුවා තිබේ. 2004 සුනාමි ව්‍යසනය හේතුවෙන් කම්පනයට පත් දරුවන් වෙනුවෙන් යෝග්‍ය වටපිටාවක් තැනීමට රජය පිහිටවූ වැඩසටහනක් සඳහා ඇය පාසල් ගුරුවරුන් 80ක් පුහුණු කළාය. ශ්‍රී ලංකාවේ ළමා අයිතිවාසිකම් වෙනුවෙන් විශිෂ්ට වූ කාර්යභාරයක් ඉටුකළ චරිතයක් ලෙස ගිත්සි ෂන්මුගම් පසුගිය වසරේ පරිසරය හා දරුවන් වෙනුවෙන් වූ රාජ්‍ය නොවන සංවිධානයක් වන එක්පැට් වෙතින්ද සම්මාන ලැබුවාය. වඩාත්ම විශිෂ්ට කාරණාව වන්නේ ඇයගේ සේවය සිංහල දෙමළ භේදයකින් තොරව ඉටුකිරීමයි.

උතුරු නැගෙනහිර යුද්ධය පැවැති සමයේ හැටවන වියේ පසුවූ ඇය සිය වයස, ජාතිය, කාන්තාවක වීම යන කිසිවක් තුට්ටුවකට මායිම් නොකර අහසින් බෝම්බ වැටෙද්දී නිරන්තරයෙන් කොළඹ හා උතුර වෙත යමින් සහන කටයුතුවල අභීතව යෙදුණාය. යුද්ධයෙන් ආබාධිත වූ සිංහල සොල්දාදුවන් මෙන්ම කොටි ක්‍රියාකාරිකයන් යන දෙපක්ෂයටම එකසේ මානසික උපදේශන සැපැයුවාය.

“මම යුද්ධයේදී කිසිම පැත්තක් ගත්තේ නෑ. වතුකරයෙන් බිහිවුණු දෙමළ දැරියක් වෙච්ච මාව හදා වඩා බලාගත්තේ සිංහල මාතාවක්. මේ නිසා ජාතීන් අතර ලොකු බෙදීමක් මට පුංචි කාලේ ඉඳලාම දැනුනේ නෑ. ආගම ගැන සැලකුවත් එහෙමයි. මම උපතින් ක්‍රිස්තියානි වුණාට මම විවාහ වුණේ හින්දු කෙනෙක් එක්ක. පස්සේ මම එම ආගම් දෙකම අතහැරලා දාලා බෞද්ධ දර්ශනය වැළඳ ගත්තා. නිර්මාංශ ජීවිතයකට හුරුපුරුදු වුණා. මේ නිසා මට පුළුල් දැක්මක් ඇතිවුණා. මම භාෂා තුනම කතා කරනවා. හමුදාව, දමිළ කණ්ඩායම් මට එක වගේ සහයෝගය දුන්නා.” මැග්සේසේ සම්මානලාභී ගිත්සි ෂන්මුගම් ගුරුමාතාව තමන්ගේ සමාජ මෙහෙවර පන්නරය ලද හැටි වැඩි විස්තර කළාය.



“මම ශාන්ත ජෝශප්වල උගන්නන කාලේ පන්තියේ සමහර ළමයින්ගේ හැසිරීමේ අමුතු වෙනස්කම් දැක්කා. ඒ අයගේ මානසිකත්වයේ ගැටලු ඇති බව දැක්කා. ඉතින්, ඉස්කෝලෙන් පස්සේ පැයක් දෙකක් ඉඳලා මේ ළමයින්ට ජීවිතයේ ගැටලු විසඳාගන්න උපදෙස් දෙන්න ගත්තා. ඕක දැක්කා අපේ පාලක පූජකතුමා බෙනඩික් ජෝශප් පියතුමා. එතුමා මාව යොමුකළා වෑවල පිළියන්දල සුබෝධි ආයතනය පවත්වාගෙන ගිය ආචාර්ය මර්වින් ප්‍රනාන්දු පියතුමන් වෙතට. එතුමා තමයි ඒ කාලේ මුල්ම මනෝ සමාජීය ක්‍රියාකාරී සංවිධානයක් පවත්වාගෙන ගියේ. එතැනදී මට මනෝ උපදේශන ගැන හොඳ පුහුණුවක් එතුමන් වෙතින් ලැබුණා. ඒ 1982  වාගේ කාලේ. එතැන් ඉඳලා මට හිතුණා යුද්ධයෙන් පීඩාවට පත්වුණ අයට පිහිටවෙන්න ඕනෑ කියලා. ඉතින් මම පාරට බැස්සා.”

ගිත්සි ෂන්මුගම් ගුරුමාතාව මනෝ උපදේශනය සහ සමාජ සත්කාරය පිළිබඳව ලබාගත් පුහුණුවීම් සහ සහතික ගොන්නකි. ඇය තමන්ගේ උපදේශන කටයුතුවලදී ලත් අත්දැකීම්ද මුසුකොට සමාජ මනෝවිද්‍යා සේවාවන්ට අයත් ලේඛන ගණනාවක්ම පලකර තිබේ. මානසික සහන උපදේශනය සඳහා ඇය (තේපැන් සාද) ක්‍රමවේදයක් 2004 සුනාමි ව්‍යසනයත් සමග හඳුන්වා දී තිබුණි. එය ඉතා සාර්ථක සමූහ මනෝ සහන ක්‍රමවේදයක් බවට ඉක්මණින්ම පිළිගැනීමට ලක්විණි. වීදි දරුවන්ගේ මනස විග්‍රහ කරමින් ඇය (What’s Inside?) නමින් කෘතියක් රචනා කර තිබේ.

“මං හුඟක් දේ ඉගෙන ගත්තා වීදි දරුවන්ගෙන්. ඔවුන් තුළ ජාති ආගම් භේද, භාෂා භේද නෑ. ඒ අයගෙන් අපිට හුඟක් ගුරුහරුකම් ගන්න පුළුවන්. ඔවුන්ට හැමදේම අහිමිවෙලා. නමුත් ඔවුන් එක සහෝදර කල්ලියක් හැටියට සාමූහිකව ජීවිතයට මුහුණ දෙනවා. පිරිමි ළමයි ගැහැණු ළමයින්ට කලිසම් කමිස අන්දවලා කොණ්ඩ කොටට කපලා තමන්වගේ පෙන්නන්න සලස්වනවා. ඔවුන් නිදා ගන්නකොට ගෑනු ළමයි මැදට දාලා පිටපැත්තේ පිරිමි ළමයි නිදාගන්නවා. ඒ තමන්ගේ සහෝදරියන්ව ආරක්ෂා කරගන්න. ඒ අය ළඟ තියෙන ළබැඳියාව සහජීවනය එකමුතු බව අපිට ලොකු ආදර්ශයක්.”


“එකපාරක් මට වීදි දරුවන් කණ්ඩායමක් හමුවුණා. ඒකේ නායකයාට අවුරුදු 17ක් විතර ඇති. එයාට තිබ්බේ සිංහල නමක්. මම ඉතින් මගේ කැඩුණු සිංහලෙන් එයාගේ කතාව අහන්න ගත්තා. ටික වේලාවක් යනකොට එයා හොඳ සුද්ධ දෙමළෙන් කතා කරන්න ගත්තා. මම දෙමළ කියලා එයාට තේරුණා. මම පුදුම වුණා. එයාගේ භාෂා දැනුම ගැන. බලනකොට මෙයාගේ උපන්ගම මන්නාරම. දවසක් රෑ ගේ ගිනිගත්තා. අම්මා තාත්තා ආගිය අතක් නෑ. ගමම එක ගිනිජාලාවක්. කරගන්න දෙයක් නැතිව එයා ඇවිදගෙන ස්ටේසමට ඇවිත්. එතැනින් කෝච්චියට නැග්ගා. ඒක ආවේ කොළඹට. එදා ඉඳන් එයා ජීවත්වෙන්න ලොකු සටනක යෙදුණා. දැන් එයා බැඳලා එහෙම සරුවට ඉන්නවා. මේ ළමයි හැමෝම කල්පනා කරන්නේ තමන්ට අහිමිව ගිය ගෙවල් ඇතුළේ පාසල් ඇතුළේ මොනවද තියෙන්නේ කියලා තමයි ඒක, ඒ අය තුළ හැමදාම තියෙන ලොකු කුතුහලයක්. තමන්ට අහිමිව ගිය ජීවිතයට එබිකම් කර බලන එක තමයි. ඒ ගොල්ලන්ගේ ලොකුම ඕනෑකම. What’s inside වලින් කතා කළේ ඒ ගැන. අන්තිමේදී ඒ අයට තමන්ට අහිමි වූ දේ හොයාගන්න අපි උදව් විය යුතුයි. ගිත්සි ෂන්මුගම් ගුරු මාතාව මැග්සේසේ සම්මානයට පාත්‍ර වූයේ ඇය මේ දරුවන් වෙනුවෙන් ලෝකයක් තනා දෙන්නට සිදුකළ උදාර මෙහෙවර අගයමිනි.

♦ සුගත් පී. කුලතුංගආරච්චි

ඉන්දියාවේ අාරක්ෂාව අතට ගත් රාක්ෂ මන්ත්‍රීනිය.

ඉන්දියාවේ අගමැති මෝදි පසුගියදා සිය ඇමැති මණ්ඩලය උඩු යටිකුරු කළේය. එහිදී සිදුවූ ලොකුම වෙනස වූයේ කවුරුන්වත් නොසිතූ නොපැතූ එකකි. එනම් සමස්ත ඉන්දියාවේ භාරදූරම රාජකාරියක් වන ආරක්ෂක ඇමැති පදවිය ස්ථීරව අති දක්ෂ දමිළ කාන්තාවක වන නිර්මලා සීතාරාමන් වෙත ලබාදීමය. වෙන කිසිවෙක් නොවඇයවත් තමන්ට ඉන්දියාවේ අගමැතිකමට සමාන බලයක් සහිත මේ කැපී පෙනෙන තනතුර හිමිවේ යැයි සිහිනයකින්වත් සිතා තිබුණේ නැත. ඉන්දිරා ගාන්ධි මැතිනියගෙන් පසු ඉන්දියාවේ ආරක්ෂක ඇමැති පුටුව මේ කාන්තාවකට ස්ථීර වශයෙන්ම හිමිවූ ප්‍රථම අවස්ථාවය. හිටපු ආරක්ෂක ඇමැතිවරයා වූ සහ දැනට ගෝවේ මහඇමැතිවරයා වන මනෝහාර් පරික්කාර් මේ පත්වීම ගැන උදම් ඇනුවේ, ඉතාමත්ම විශිෂ්ට තේරීමක් ලෙස දක්වමිනි. මේ තරම් ප්‍රශංසාවක්, විශ්වාසයක් හිමිකරගත් මේ ප්‍රබල දමිළ කාන්තාව, නිර්මලා සීතාරාමන් කවුද?

“මං වගේ අන්තිම අඩියෙන් ආරම්භ කරපු තැනැත්තියකට මේ වගේ ඉහළම තනතුරක් හිමිවුණේ විශ්ව ශක්තියේ අනුග්‍රහයෙන් තමා” යැයි ඇය තමන්ට ලැබුණු ප්‍රබල තනතුරු අදහාගත නොහැකිව ප්‍රකාශ කළාය. තමිල්නාඩුවේ, මදුරාසිවල ජීවත්වූ දුම්රිය සේවකයකු වූ ශ්‍රී නාරායනන් සීතාරාමන්ගේ දියණිය ලෙස ඇය ජීවිතය ඇරැඹුවේ ඉහත කීවාක් මෙන්ම අන්තිම අඩියෙනි. ජවහල්ලාල් නේරු සරසවියෙන් ආර්ථික විද්‍යාව පිළිබඳ උපාධිය දිනාගත් ඇය සිය දිවිමග සහකරුවාගේ සිතද එහිදීම දිනාගත්තාය. නිර්මලා භාරතීය ජනතා පක්ෂයට ලැදි පවුලක තැනැත්තියක වූ අතර ඇගේ සැමියා පැවත ආවේ කොංග්‍රසයට ලැදි පවුලකිනි. ඇගේ සැමියා පී. ප්‍රභාකර්ගේ පියා ආන්ද්‍ර ප්‍රදේශ්හි කොංග්‍රස් මන්ත්‍රීවරයකු විය. මේ අඹුසැමි දෙපළ කලක් බ්‍රිතාන්‍යය වෙත සංක්‍රමණය වන අතර නිර්මලා කුඩා ආයතනයක ලිපිකාරිනියක ලෙස කටයුතු කළාය. නමුත් ඇගේ පර්යේෂණාත්මක දැනුම සහ අත්දැකීම් ඔස්සේ Price water house Cooper නම් වූ ප්‍රබල ආයතනයට ජ්‍යෙෂ්ඨ කළමනාකාරිනියක ලෙස එක්වන අතර කලක් BBC ලෝක සේවයේද කටයුතු කළාය. නැවත 1991 දී මේ දෙපළ ඉන්දියාවට පැමිණෙන අතර ඇගේ පළමු දරැවා ලැබීම සඳහා සතියක කාලයක් චෙන්නායිවල රෝහලක නැවතී ඉන්නට සිදුවන්නේ රාජිව් ගාන්ධි ඝාතනය හේතුවෙන් පැනනැගුණු විරෝධය හේතුවෙනි. පසුව දුවණියක ලබන ඇය හයිද්‍රාබාදය සිය නිවහන කරගත්තාය. හයිද්‍රාබාදයේ බොහෝ සමාජ කටයුතුවල මුල් තැනගත් ඇය (ප්‍රාණව) නම්වූ පාසලක්ද ඇරැඹුවාය. කාන්තාවන් සඳහා ජාතික කොමිසමේ සාමාජිකාවක ලෙස කටයුතු කළාය. නිර්මලාගේ බොහෝ රාජකීය පත්වීම් මේ අවස්ථාවේ ලැබුණාක් මෙන්ම අහසින් කඩා පාත්වුණාක් මෙන් ලැබුණු ඒවාය.


සුෂ්මා ස්වරාජ්ගේ බලපෑම ඔස්සේ ඇය අගමැති මෝදිගේ භාරතීය ජනතා පක්ෂ කණ්ඩායමට එක්වන අතර එහි ප්‍රකාශිකාවක බවට පත්වන්නීය. ඒ හේතුවෙන් ඇය නිතර නිතර, රූපවාහිනී සහ ජනමාධ්‍ය ඔස්සේ මුහුණ පෙන්වන ජනප්‍රිය චරිතයක් බවට පත් වූවාය. 2014 මැතිවරණයේදී ඇගේ ජනප්‍රියතාවද උපයෝගී කර ගනිමින් මෝදි බලයට ගෙන ඒමට ඇය විශාල මෙහෙයුමක යෙදුණාය. මෝදිගේ ජයග්‍රහණයත් සමග ඇයට වාසනාව උදාවන්නේය. ඇය වානිජ හා කර්මාන්ත පිළිබඳ රාජ්‍ය ඇමැති ධුරයේ දිවුරුම් දෙන්නේය. ඉන්දියාවේ තවත් ප්‍රබල දේශපාලන භූමිකාවක් වන අරුන් ජෙත්ලි යටතේ ඇය මුදල් අමාත්‍යංශයේද කටයුතු කරන්නේය. ආන්ද්‍රා ප්‍රදේශ් ප්‍රාන්තයෙන් අතුරු මැතිවරණය දිනා ඇය පාර්ලිමේන්තුවට එන්නේ පසුකාලීනවය. 2016 දී රාජ්‍ය සභාව සඳහා BJP නියෝජනය කරමින් තරග වදින ඇය කර්නාටක ප්‍රාන්තයෙන් ඉහළ ජයක් වාර්තා කරන්නීය. දැන් කවුරුත් නොසිතූ ලෙස ඉන්දියාවේ පූර්ණකාලීන ආරක්ෂක ඇමැති ධුරය හිමිවූ ප්‍රථම කාන්තාව බවට පත්වීමට ඇයට හැකිව තිබේ.

ඉන්දියාව කලාපීය වශයෙන් දැනට පත්ව සිටින බලය රඳවා ගැනීමේ මහා අලකලංචියට සාර්ථකව මුහුණ දෙන්නට නිර්මලා සීතාරාමන් හට හැකිවේද? යන්න ගැන ඇය තනතුරට පත්වන්නටත් පෙර සිටම මාධ්‍ය ඔස්සේ මහත් ආන්දෝලනාත්මක විවේචන එල්ල වී තිබුණි. ඉන්දියානු හමුදාව උඩු යටිකුරු කර නවීන තාක්ෂණයෙන් සන්නද්ධ කර ශක්තිමත් කිරීමටත්, ලෝක ආයුධ වෙළෙඳපළට ඉන්දියානු ලකුණ එක් කිරීමටත්, කලාපයේ බලවතා වීමටත් මෝදිට අවශ්‍යව තිබේ. ඒ සඳහා පූර්ණකාලීන ප්‍රබල ආරක්ෂක ඇමැතිවරයකුගේ බලපෑම ඕනෑ වී තිබුණි. එහෙයින්ම මෝදි තමන්ගේ ප්‍රබලම ඇමැතිවරුන් වන රන්ජිත් සිංග්, අරුන් ජෙත්ලි, සුෂ්මා ස්වරාජ් සහ නිතින් ගාද්කාරි හට මේ වෙලේ ලොකු රාජකාරියක් පැවැරුවේය. ඒ තමන්ට නිත්‍ය ආරක්ෂක ඇමැති ධුරයට සුදුස්සෙකු සොයා දෙන ලෙසටයි. පුරා රාත්‍රී දෙකක් ස්වරාජ්, ජෙත්ලී සහ ගාද්කාරි, රන්ජිත් සිංගේ නිවසේ ගත කළේ මේ බරපතළ රාජකාරිය ඔහුට බාර දෙන්නටය. නමුත් ඒ සාකච්ඡා විසදුම් රහිතව නිමා වූ බව වාර්තාවේ. ඒ අවස්ථාවේ මෝදිගේ හිතට ආ එකම නම නිර්මලා සීතාරාම්ලු! ඇගේ ඇති සේවයට කැපවීම, අවංකත්වය මෙන්ම ඇගේ නමට උචිත නිර්මල පැවැත්ම මෝදිගේ මේ තේරීමට ප්‍රධාන හේතුන් වූ බව කියයි. ජනමාධ්‍ය නිර්මලා හඳුන්වන්නේ (රාක්ෂ මන්ත්‍රීනිය) හැටියටය. දැන් මේ රාක්ෂ මන්ත්‍රිනිය ආරක්ෂක ඇමැතිනිය වී හමාරය. ඉන්දියාවේ යකඩ ගැහැනිය වූ ඉන්දිරා ගාන්ධි ආරක්ෂක ඇමැතිනිය හැටියට රටේ බොහෝ පිරිමින්ට කරන්නට නොහැකි වූ වෙනස්කම් සිදුකළාය. ඇය පාකිස්තානය දණගස්වා බංග්ලාදේශය බිහිකළාය. දැන් ඉන්දියාවේ රාක්ෂ ඇමැතිනිය වැඩ අරඹා තිබේ. ඇගේ ගමන යකඩ ගැහැනියද පරදවන තරම් යක්ෂ වේගයකින් සිදුවනු ඇත.

♦ සුගත් කුලතුංගආරච්චි

"පියුමි හංසමාලි, අක්ෂා සුදාරි කියන්නේ තනිකරම මුඩුක්කු ගෑනු" - ශෂී හේවගේ


නිරූපණ ශිල්පිණියක් වන ශෂී හේවගේ පුවත්පත් සාකච්ඡාවක් හමුවේ කියා ඇත්තේ පියුමි හංසමාලි සමග ගුටි බැට හුවමාරුවක් සිදුවූ බවටයි. නමුත් ඇය ෆේස්බුක් ගිණුම් ඔස්සේ දැන් කියා ඇත්තේ අදාළ සම්මුඛ සාකච්ජාව වෙබ් අඩෙවිවල පළවූ පසුව ඇගේ ෆේස්බුක් ගිණුමෙන් ඇය මෙවැනි දෙයක් නොපැවසූ බවත්, මෙයට එරෙහිව නීතිමය ක්‍රියාමාර්ග ගන්නා බවත්ය. මේ එම පුවත්පත් සාකච්ඡාවයි.

මොකද්ද ශෂී මේ පියුමි එක්ක ගහගත්තා කියන කතාවේ ඇත්ත නැත්ත…?
ඒ කතාව ඇත්ත අපි දෙන්නා නුගේගොඩ බෝ ගහ යටදී ගහගෙන පොලිසි ගියා

මුල සිට විස්තරේ ශෂී අපට කියනවද…?
මම මේ ගැන මාද්‍යයට කියලා ප්‍රසිද්ධියේ සවූත්තු වෙන්නේ නෑ කියලා හිතාගෙන ගිටියේ . එත් මම නිහඬව ඉන්න එක මට ලොකු අසාධාරණයක් වෙනවා , පියුමි හංසමාලි එයාගේ මුඩුක්කු ගතිය ප්‍රදර්ශනය කරනවා

ශෂී කොහොමද පියුමිව අදුනාගත්තේ…?
බියුටි සැලෝන් එකක් අයිති කෙනෙක් හරහා තමයි මම පියුමිව අදුනගත්තේ , ඉස්සර එයා මගේ හොඳ යාලුවෙක් නෙවෙයි නමුත් කාලයක් අපි යාළුවො වගේ හිටියා එයාගේ තරම මම දැනගත්තා

කොහොමද යාළුකම වැඩිවුණේ…?
මගේ ගම මාතර , නමුත් නිරුපණ වැඩවලට නිතර කොළඹ එනකොට මට කොලඹ නතර වෙන්න තැනක් ඕන වුනා මම එක මාසෙකට පියුමිගේ රාජගිරියේ ගෙදර නතර වුණා. ඒ මට යන්න එන්න තැනක් නැතුව නෙවෙයි කොළඹින් කුලියට ගෙයක් හොයාගන්නකන් විතරයි

පියුමිගේ ගෙදර නතර වුණේ කුලී ගෙවලද…?
මම සෑහෙන්න සල්ලි වියදම් කළා. පියුමිගේ අම්මා ඉන්නේ පියුමිගේ ගෙදරමයි. ඒ අම්මා පියුමිගේ මහත්තයා ගෙදරින් එලවා ගන්න හූනියම් කරනවා. මම පියුමිගේ ගෙදර පිනට කන්න වැටිලා හිටියේ නෑ‍.

පියුමි මාධ්‍යයට කියලා තිබුණා ශෂී පියුමිගේ මහත්තයා එක්ක අනියම් ඇසුරක් පවත්වනවා කියලා…?
ඔව් මම ඒක දැක්කා.

පියුමිගේ සැමියා එක්ක ශශීගේ එහෙම ඇසුරක් තිබුණද…?
පියුමිටයි එයාගේ අම්මටයි ඕන කොහොම හරි කතා පතුරවලා ඒ මිනිහව ගෙදරින් එලියට ඇදලා දාන්න එයා එක්ක මගේ කිසිම අනියම් ඇසුරක් නෑ. මගේ කකුල් දෙකත් පිරිසිදුයි පියුමිගේ මනුස්සයට වඩා. පියුමි හංසමාලිට ඒ වගේ මනුස්සයෙක් ලොකු වුණාට මට එහෙම අය එක්ක ඉන්න බෑ.

ශශීට පෙම්වතෙක් ඉන්නවද…?
මම කසාද බැදපු කෙනෙක් මගේ මහත්තයා ස්වීඩන් රටේ හෝටල් ව්‍යාපාරිකයෙක් . තව මාස දෙක තුනකින් මාත් මගේ මහත්තයා ලඟට යනවා.

එත් ශෂී පියුමි යාළුවො දෙන්නම රාත්‍රී සාදවලට එකට ගමන් බිමන් ගියා ප්‍රසිද්ධියේම…?
එක මම නැහැයි කියන්නේ නෑ , මම රාත්‍රී සාද – උත්සවවලට ගියේ තනියම ගෙදරින් එලියට බැහැලා ගියාට , පියුමි තනියම යන්නෑ එයා යන්නේ එයාගේ පෙම්වත්තු එක්ක.

පෙම්වත්තු කියන්නේ සැමියාට අමතර තව පෙම්වත්තු කීප දෙනෙක් හිටියා කියන එකද…?
අපොයි ඔව් මොකද නැත්තේ පියුමිට වියදම් කරන්නේ ඒ ගොල්ලෝ තමයි.

මේ දේවල් ගැන වගකීමෙන්ද ශෂී කතාකරන්නේ…?
ඔව් . පියුමි මාත් එක්ක අමනාප වුණේ එයාගේ පෙම්වතා ගැන තොරතුරු මම එයාගේ සැමියාට කීවා කියලා හිතලයි.

ශශීගේ හැසිරීම හොඳනැති නිසා පියුමිගේ ගෙදරින් යන්න ශශීට යන්න වුනා වුණා කියන කතාව ඇත්තද,..?
එයා මාව එලෙවුවේ නෑ මගේ බෝයි ෆ්‍රෙන්ඩ් මට වැල්ලවත්තෙන් කුලියට ගෙයක් අරගෙන දුන්නා.

ඉතින් අන්තිමේදී ගහගත්තේ කොහොමද…?
මම නුගේගොඩ සැලුන් එකක එදා හිටියේ පියුමි එතනට ඇවිත් මම උබව අල්ලගන්න හිටියේ කියල කෑගැහුවා , පියුමි එක්ක අක්ෂා සුදාරිත් ආවා මම ත්‍රීවීල් එකක නැග්ගා , ඒ දෙන්නා මාව ලුහුබන්දා , මම නුගේගොඩින් බැස්සා , පියුමිත් බැහැලා ඇවිත් මට ගැහුවා මගේ ඇදුම් ඉරුවා මගේ ඉවසීම පැන්නා, මාත් ගැහුවා.

ශශීත් ගැහුවා….?
මගේ ඇදුම ඉරුවට පස්සෙයි මම ගැහුවේ , අක්ෂලා,පියුමිලා වගේ මුඩුක්කු ගෑනු වගේ හැසිරෙන කෙනෙක් නෙවෙයි මම.

ශෂී කලක් ලඟින්ම ආශ්‍රය කරපු ඒ යාළුකම ගැන මොකද හිතෙන්නේ ?
කපටි ගෑනු කෙනෙක් එයා , එක අතකින් තමන්ගේ අම්මට දරුවට සැමියාට නැති කෙනා මට මෙහෙම සලකන එක ගැන පුදුමයක් නෑ..‍

ශශීගේ සැමියා මේ සිද්ධිය ගැන මොකද කිවුවේ ?
එයා මට බැන්නා , ඕනවට වඩා යාළුවො ආශ්‍රය කරනවා කියලා.

ශෂී ඉක්මනින් රටින් යන්නේ කලකිරිලද ?
නෑ . මම කොහොමත් මගේ හස්බන්ඩ් ලඟට ස්වීඩනයට යන්න ලෑස්ති වෙලා ඉන්නේ එතකන් මොඩ්ලින් වැඩ කරනවා.

මේ සිද්දිය ගැන පොලිස්සියේ පැමිණිල්ලක් කළා නේද…?
ඔව් මම මිරිහාන පොලිස්සියේ පැමිණිල්ලක් කළා , එක විභාග වුණා.

සමතයට පත්වෙන්න අදහසක් නැද්ද..?
පියුමි කවදා හරි ඔලුව බිම ඇනගෙන මගේ කකුල් දෙක ලඟට එන බව මම දන්නවා

(උපුටා ගැනීමකි.)