මට ඕන වුණේ විසේකාරියක් වෙන්න - ඔටාරා.



ඔටාරා ගුණවර්ධන අපිට මුණගැසුණේ ඇයගේ කාර්යාලයේදී. සාමාන්‍ය ව්‍යාපාර හිමිකරුවෙක් පරිහරණය කරන කාර්යාලයකට වඩා එය තරමක් වෙනස් කියලා බැලූ බැල්මටම පෙනුණා. මගේ අවධානය මුලින්ම යොමුවුණේ ඇයගේ මේසයට පිටුපසින් තිබුණ බුදුපිළිමයට එහා පසින් තිබෙන පිඬුසිඟා වඩින හිමිනමකගේ පිළිරුව වෙත. එසේම ඇයගේ මේසය මත නොයෙක් නොයෙක් කුඩා ප්‍රමාණයේ ලස්සන ලස්සන මූර්ති සහ ෆෙංෂුයි නිෂ්පාදන කිහිපයක් තිබුණා. විලාසිතාවට සහ කලාත්මක බවට ඇය තුළ වූ සැබෑ කැමැත්ත ඇය සිටින තැන වටපිටාවෙන් මනාව පිළිබිඹු වුණා. මෑතක් වන තුරුම ඔඩෙල් සමාගමේ හිමිකාරීත්වය දැරූ ඇය තම සමාගමේ හිමිකාරීත්වය සොෆ්ට්ලොජික් සමාගමට පැවරුවා. නමුත් තවමත් ඇය එහි ප්‍රධාන විධායක නිලධාරිනිය වශයෙන් සේවය කරනවා.
සන්නාමකරණය සහ අලෙවිකරණය සේම නවීන විලාසිතා පිළිබඳ මනා දැනුමක් සහිත ඇය නිතරම ව්‍යාපාර අරමුණුවලින් ඔබ්බට ගොසින් යහපත් සමාජයීය වෙනසක් කරන්න ඇප කැපවන බව ඇය වත්මනේදී ක්‍රියාත්මක කරන වැඩසටහන්වලින් මනාව ඔප්පු වෙනවා. මේ නිතරම හිනාවෙලා ඉන්න ඔටාරා සමඟ කළ සුහද සංවාදයයි.

  • ඔටාරා ඔබ පාට එක්ක වැඩ කරන කෙනෙක්. මේ දවස්වල ඔබගේ ජීවිතය පාට කරන්න කැමැති මොන පාටින්ද?
(සිනා) රෝස පාටින්.
  • ඒ ඇයි?
ඒ පාට කරුණාව සහ ආදරය සමඟ සම්බන්ධ නිසා වෙන්න ඇති. ජීවිතයේ පාට කාලෙන් කාලෙට වෙනස් වෙනවා. දැන් කාලේ නම් රෝස පාටින්.

  • පුංචි කාලේ උත්සාහ කළේ හැඩකාරියක් වෙන්නද? වැඩකාරියක් වෙන්නද? විසේකාරියක් වෙන්නද?
(සිනා) විසේකාරියක් වෙන්න ඕන වුණා.

  • පුංචි කාලේ ඉඳන්ම ස්වභාවධර්මයට සහ සත්ත්වයන්ට කැමැතිද?
ඇත්තටම ඔව්. මට මතක කාලේ ඉඳන්ම මම ආසයි පරිසරයට සහ සත්ත්වයන්ට ආදරය කරන්න. ඒක නිසා තමයි මම ජීවවිද්‍යා අංශයෙන් උපාධියක් කළේ.
  • 1990දී සේවකයන් දෙන්නෙක් යොදාගෙන හදන්න පටන් ගත්ත ඔඩෙල් කියන ව්‍යාපාරික දරුවා කල වයස ආවාට පස්සේ 2014දී සොෆ්ට්ලොජික් සමාගමට බන්දල දුන්නා. ඔබේ දරුවෙක් වැනි ඔඩෙල් අහිමිකර ගැනීම තුළ ලැබුණ සතුට මොකක්ද?
(සිනා) වෙලාව ආවම අපිට සමහර දේවල් අත්හරින්න සිද්ධ වෙනවා. ඇත්තටම ඒක ලෙහෙසි තීරණයක් නෙවෙයි. මම වසරක පමණ කාලයක් හිමින් මේ තීරණය ගැන ගොඩක් කල්පනා කළා. මගේ අනාගත සතුට වෙනුවෙන් තමයි මේ තීරණය කැමැත්තෙන්ම ගත්තේ.

  • පිස්සු තීරණයක් ගන්නේ කියලා කවුරුත් කිව්වේ නැද්ද?
නැහැ. මගෙත් එක්ක සමීපව ඉන්න සහ වැඩ කරන අය දන්නවා මම ගොඩක් හිතල බලලා තීරණ හරියට ගන්නවා කියලා. ඒක නිසා කවුරුත් මගේ තීරණය වෙනස් කරන්න උත්සාහ කළේ නැහැ. මේක මම ගොඩක් විශ්ලේෂණය කරලා ගත්ත තීරණයක්.
ශ්‍රී විලාසිතා කිරීම තුළ කෙනෙක්ට ලැබෙන ප්‍රතිලාභය මොකක්ද?
අනිත් අයගේ මනස තුළ හොඳ හැඟීමක් ඇති කරන්න විලාසිතාවලින් පුළුවන්.

  • වොරන් බෆට්, බිල් ගේට්ස්, මාර්ක් සකර්බර්ග් වගේ ව්‍යාපාරිකයන් ධනවාදයට නව අරුතක් දෙමින් දැවැන්ත ධන පරිත්‍යාග කරමින් ලෝකයේ උන්නතිය වෙනුවෙන් කටයුතු කරනවා. මේ ප්‍රවණතාව ඔබ දකින්නේ කොහොමද?
ඒ වගේ දෙයක් තමයි මටත් දැනුණේ. දිගටම ව්‍යාපාර කරද්දි කොයිතරම් කළත් තවත් වැඩි වැඩියෙන් මුදල් හොයන්න ඕන. ව්‍යාපාරය දියුණු කරන්න ඕන කියන පීඩනය මට විතරක් නෙවෙයි ඕන කෙනෙක්ට තියෙනවා. එහෙම නැතිව ව්‍යාපාර කරන්න බෑ. නමුත් ජීවිතයේ සැබෑ අර්ථය මුදල්වලින් ඔබ්බට ගිය එකක්. ඒ නිසා ව්‍යාපාර කටයුතුවලින් එහාට ගිහින් ජීවිතය අර්ථවත් කරන්න කටයුතු කරන්න ඕන.


  • බල්ලන්ගෙන් මිනිසුන්ට ඉගෙන ගන්න තියෙන හොඳම පාඩම මොකක්ද?
බල්ලන්ගෙන් මිනිසුන්ට ගොඩක් දේවල් ඉගෙන ගන්න පුළුවන්. ඒ අය තුළ කුහකකම සහ ඊර්ෂ්‍යාව නැතිකම හොඳ පාඩමක්. ගොඩක් සමීක්‍ෂණවලින් පවා හෙළි වෙලා තියෙනවා බල්ලන් ඇති කිරීමෙන් සතුට සහ ජීවන රටාව වැඩි දියුණු වෙනවා කියලා. නමුත් සුරතල් සතුන් කූඩුවල දාන්නේ නැතුව පවුලේ කෙනෙක් වගේ ඔවුන්ට සලකන්න ඕන.


  • මීට අවුරුදු 25කට විතර කලින් බලය, ආදරය සහ නිදහස කියන තුනෙන් එකක් තෝරා ගන්න කිව්වොත් ඔබ තෝරාගන්නේ කුමක්ද?
මට ඒ තුනම ඕන.
  • ඒ ඇයි?
ආදරය කොහොමත් ජීවිතයට අවශ්‍ය දෙයක්. මම කියන්නේ සෑම සත්ත්වයෙක්ටම මනුෂ්‍යයෙක්ටම දක්වන ආදරය සහ කරුණාව ගැන. ඒ වගේම තරුණ කාලයේදී මා තුළ බලයට කැමැත්තක් තිබුණේ නැත්නම් අභියෝග හමුවේ මම අසරණ වෙන්න ඉඩ තිබුණා. ඒක නිසා බලය අවශ්‍යම වුණා. මට මතකයි එක වරක් ඩික්මන් පාරේ තිබුණ මගේ ඔඩෙල් සාප්පුව ගිනිගෙන විනාශ වුණා. ඒ වගේ වෙලාවක දුක්වෙලා හැමදේම අත්හරින්න ලෙහෙසියෙන් පුළුවන්. නමුත් බාධක හමුවේ නොසැලී ඉදිරියට යන්න තමන් තුළ බලයක් අවශ්‍යයි.
  • මවුපියන්ගෙන් ලැබුණු සහයෝගය කොහොමද?
ඇත්තටම මගේ මවුපියන් ඒ අයට කැමැති දේ නෙවෙයි මට කැමැති දේ කරන්න මට අවස්ථාව සහ නිදහස දුන්නා. ඒක ගොඩක් වටිනවා.
  • ඔබ සේවක සේවිකාවන් දිරිගන්වන්නේ කෙසේද?
සේවක සේවිකාවන් දිරිගන්වන්න සල්ලි නෙවෙයි ඉතාම වැදගත්.

පඩිය ඉතා වැදගත් කියලා මම දන්නවා. නමුත් රැකියාව කැමැත්තෙන් සහ අභිමානයෙන් කරගෙන යන්න අවස්ථාව ඔවුන්ට ලබාදෙන්න ඕන. ඒ වගේම වැඩ කරන්න හිතෙන ආයතනික පරිසරයක් ගොඩනඟන්න ඕන.
  • ආයතනයේ අභ්‍යන්තර දේශපාලන ගැටලු කළමනාකරණය කරන්නේ කොහොමද?
කිසියම් ප්‍රශ්නයක් ගැන කවුරු හරි කිව්වම ඒක ඇත්තටම ප්‍රශ්නයක් වෙන්න ඕන. ඒ කියන්නේ ප්‍රශ්නයක ස්වරූපය තියෙන්න ඕන. එහෙම නැතුව එක එක්කෙනා කියන කතා මම අහන්නේ නෑ. එහෙම කේලාම් අහන්න කාලය වෙන් කරන්න ගියොත් ව්‍යාපාර කරන්න වෙන්නේ නෑ. ඒ අයට හිතෙන විදියට ඔඩෙල් එක දියුණු කරන්න අවශ්‍ය යෝජනා දෙන්න ඔඩෙල් එකේ වැඩ කරන අයට නිදහස තියෙනවා. ඒ වගේ ආයතනික සංස්කෘතියක් තියෙන නිසා අපේ සමාගමේ මෑතකාලීනව අභ්‍යන්තර දේශපාලන ගැටලු ඉතාම අඩුයි.
  • ඔබ වඩාත් අගය කරන කාන්තා චරිතය කවුද?
තෙරේසා මවුතුමිය.

  • මේ වන විට ඔඩෙල් ෆේස් බුක් පිටුවට කැමැත්ත ප්‍රකාශ කිරීම් (Likes) 305114 තියෙනවා. ඔබගේ ෆේස් බුක් පිටුවට කැමැත්ත ප්‍රකාශ කිරීම් (Likes) 318119 ක් තියෙනවා. බොහෝ දුරට මේවා සමානයි. ඔටාරා ඔබ ඔඩෙල් සමාගමෙන් ඉවත්වීම තුළ ඔඩෙල් ආයතනය ඒ ආකාරයෙන්ම තවදුරටත් පවතියිද? එහෙම නැතුව ඔඩෙල් නාමයට තියෙන කැමැත්ත අඩු වෙයිද?
මම සහ ඔඩෙල් ව්‍යාපාරය අතර සමීප බැඳීමක් තිබුණත් ඔඩෙල් කියන නාමය දැන් මනාව ස්ථාවර වෙලා තියෙන්නේ. මම සහ ඔඩෙල් කියන්නේ දෙන්නෙක්.
  • සමස්තයක් ලෙස කාන්තාවකගේ ඔබ හඳුනා ගත්ත ප්‍රධාන ශක්තිය සහ දුර්වලතා මොකක්ද?
කාන්තාවන්ට එකවර ගොඩක් වැඩ කරන්න පුළුවන්. ඒක ඔවුන්ගේ ශක්තියක්. ඔවුන් බොහෝ විට තමන් පිළිබඳ අවතක්සේරුවක ඉන්නවා. එහෙම හිතන එක කාන්තාවන්ගේ දුර්වලතාවක්.

  • හරි පුද්ගලයන්, හරි අවස්ථාවේ හමුවීම සාර්ථකත්වයට දැඩිව බලපානව. මේ පිළිබඳ ඔබගේ අදහස කුමක්ද?
ඔව්. ඒක ඉතා වැදගත්. ඕනෑම කෙනෙක් හරි අවස්ථාවේදී හමුවීම වැදගත්. ඒ වගේම ගමන් මඟේදී අපිට හමුවෙන සහ ළංවෙන අයගෙන් පුද්ගලයන් කවුද කියලා වටහාගන්න පුළුවන් වෙන්නත් ඕන. හරි පුද්ගලයන් හරි අවස්ථාවේ තමන්ට සමීප වෙන බව කලින් දැනගෙන ඔවුන් සමඟ එකතුවෙලා වැඩ කරන්න ඕන. එහෙම නැත්නම් ඔවුන් ජීවිතයෙන් මඟහැරෙන්න පුළුවන්.
  • මීට වසර 25කට විතර කලින් ඔබ මුලින්ම භාණ්ඩ විකුණුවේ ඔබගේ ස්ටේෂන් වැගන් මෝටර් රථයෙන්. දැන් භාවිත කරන වාහනය මොකක්ද?
දැන් මම බෙන්ස් එකක් භාවිත කරන්නෙ. ඒ පරණ ස්ටේෂන් වැගන් මෝටර් රථය තාමත් මගේ ළඟ තියෙනවා.

  • එම්බාර්ක් වෙළෙඳ නාමය ඔඩෙල් සමඟ විකුණුවාද?
නැහැ.
  •  ඒ කියන්නේ එම්බාර්ක් ක්‍රියාත්මක වෙන්නේ ඔඩෙල් එකෙන් බැහැරවද?
එම්බාර්ක් නිෂ්පාදන අලෙවිකරන්නේ ඔඩෙල් සාප්පුවල පමණයි. නමුත් එම්බාර්ක් ක්‍රියාත්මක වෙන්නේ වෙනම.
  • ඔබගේ ඊළඟ ව්‍යාපාර කටයුත්ත එම්බාර්ක් වෙන්න පුළුවන්ද?
ඔව්.

  • වත්මන් පරම්පරාවේ ඔබ හඳුනාගත්ත වැදගත් ලක්‍ෂණ මොනවාද?
ඇත්තටම ඔවුන්ට අවශ්‍යයි වඩා හොඳ ලෝකයක් නිර්මාණය කරන්න. ඒ වගේ යහපත් වෙනස්කම්වලට ඔවුන් කැමැතියි. ඒක නිසා නව පරම්පරාව ස්වභාවධර්මයට ආදරය කිරීම ඉතාම වටිනවා.
  •  ඔබ මොන වගේ පොත්පත්ද කියවන්නේ?
කාලෙන් කාලෙට එක එක පොත් කියවනවා. විශේෂයෙන් චරිත කතා, ධනාත්මක චින්තන පොත් සහ විලාසිතා සම්බන්ධ දේවල් කියවනවා. ඉස්සර නම් රිචර්ඩ් බ්‍රැන්සන්, වොරන් බෆට් ගැන ලියැවුණ පොත් එහෙම කියෙව්වා.
  •  ඔබ වාසනාව විශ්වාස කරනවාද?
ඇත්තටම මම වාසනාව විශ්වාස කරන්නේ නෑ. ඉතා වැදගත් වෙන්නේ ධනාත්මකව සිතීම සහ ඒ අනුව වැඩ කිරීම. මම මේ තත්ත්වයට එද්දි ගොඩක් හිනා වුණා වගේම ගොඩක් රහසින් අඬපු අවස්ථා තියෙනවා. දුකක් දැනුණු අවස්ථාවල අද නරකක් වුණත්, හෙට හොඳක් වෙයි කියලා මම හිතුවා. මට මේ අත්දැකීම් ලැබුණේ අනාගතයේ හොඳට කියලා හිතලා හිත ධෛර්යවත් කර ගත්තා.
  • බාධක හමුවේ ඔබව ධෛර්යවත් කළේ කවුද?
මාව ධෛර්යවන්ත කළේ මමමයි.

  • ඔබ දෙවියෝ විශ්වාස කරනවාද?
මම බෞද්ධ ආගමිකයෙක් වුණත් දෙවියෝ විශ්වාස කරනවා. දෙවියෝ කියන්නේ මෙහෙමයි, මට හිතෙනවා විශ්වයේ අපිට පෙනෙන්නේ නැති මොනවා හරි ලොකු බලයක් තියෙනවා කියලා. මම ඒ බලය විශ්වාස කරනවා.
  • හොඳ නායකයෙක් මොන වගේ වෙන්න ඕනද?
නායකයා කොයිතරම් සේවකයන්ට වැඩ කළත්, කොයිතරම් දේවල් ඉගැන්නුවත්, ඒවාට වඩා සේවකයන් තුළ නායකයා ඇති කරන හැඟීම තමයි ඉතා වැදගත්. සේවකයන් තුළ යහපත් හැඟීමක් ඇති කළ හැකි නායකයෙක් වීම ඉතා වැදගත්.
  • ඔබ ගොඩක් සතුටු වෙන්නෙ කුමක් කිරීමෙන්ද?
මූලිකව සතුන්ට උදවු කිරීමෙන්. විලාසිතාවලට, වෙළෙඳනාම නිර්මාණය කරන්න, ව්‍යාපාර කරන්න ආසයි. එහෙත් ලොකුම කැමැත්ත තියෙන්නේ සතුන්ට උදවු කරන්න සහ රැක බලා ගන්න.

  •  ඔයා ගැන මිනිස්සු තාම හඳුනාගෙන නැති ලක්‍ෂණ මොකක්ද?
ව්‍යාපාර කරනවාට වඩා ආදරය සහ කරුණාව ලබාදෙන්න මම ගොඩක් කැමැතියි.
  • සුරතල් සත්තු එක්ක වැඩ කරද්දි වගේ ආයතනයේ වැඩ කරද්දි සේවකයන් හුරතල් කරලා, ඔළුව අතගාලා වැඩ ගන්න පුළුවන්ද? එහෙම නැතුව ටිකක් සැර වෙන අවස්ථා එහෙම නැද්ද? ඔබගේ එහෙම පැත්තක් තියෙනවා නේද?
(සිනා) ආහ්... අන්න ඒ පැත්ත තමයි වැඩිය කවුරුත් දන්නේ නැත්තේ. සමහර අවස්ථාවල මම ටිකක් සැර වෙනවා තමයි. නමුත් සැරවීම ප්‍රමාණයකට තියෙන්න ඕන. සේවකයන්ට නරක වචන කියලා, ඔවුන්ගේ ආත්මාභිමානය නැති වෙන විදියට කෑ ගහලා බනින්න හොඳ නෑ. ඒක තේරුමක් නෑ. නමුත් සේවක සේවිකාවන්ගේ වැරැදි අඩුපාඩුකම් පෙන්වන්න ඕන. මට තරහා යන එක ගොඩක් අඩුයි. නමුත් තරහා යන්නේ නෑ කියන්නත් බෑ.

  • ක්‍රීඩාව තුළින් ඉගෙන ගත්ත අමතක නොවන ජීවන පාඩම මොකක්ද?
මම පාසල් කාලේ ගොඩක් ක්‍රීඩා කළා. පිහිනුම්, උස පැනීම, දිවීම වගේ ගොඩක් ක්‍රීඩා කළා. එම ක්‍රීඩා කළ නිසා මම නිතරම පළමුවැනියා වෙන්න උත්සාහ කළා. ක්‍රීඩා කරද්දි කවුරුත් නිතරම උත්සාහ කරන්නේ පළමුවැනියා වෙන්න. පළමුවැනියා වෙන්න ඕන කියන හැඟීම සහ ධෛර්යය ආවේ ක්‍රීඩාවට සම්බන්ධ වීම නිසා.

  • අපි දන්නවා The Body Shop ව්‍යාපාරයේ නිර්මාතෘවරිය වන අනිටා රොඩික් සිය ව්‍යාපාරය L'Oréal සමාගමට විකුණලා ස්වභාවධර්මය රැකගන්න ජීවිතයම කැප කළා. එම නිසා ඇය "හරිත රැජන" ලෙසත් හඳුන්වනවා. මේ වගේ සමාජ සත්කාරක පැත්තකට යොමුවෙන්න ඇයගේ චරිතයෙන් පෙලඹවීමක් ඔබට ලැබුණාද?
ඇත්තටම මට එහෙම පෙලඹවීමක් ඇතිවුණේ බි්‍රජට් බාර්ඩෝගෙන්. ඔබ දන්නවා ඇය ජනප්‍රිය නිළියක්. මම මාස හයකට විතර කලින් පැරීසියේ පිහිටි ඇයගේ කාර්යාලයට ගියා. ඇය අසනීපයෙන් හිටිය නිසා මුණගැසුණේ නෑ. නමුත් ඇය සත්ත්වයන් වෙනුවෙන්, ස්වභාවධර්මය වෙනුවෙන් කරලා තියෙන වැඩ කොටස දැක්කම මටත් හිතුණා අපිට මේ ලෝකයට තව කොයිතරම් වැඩ කරන්න පුළුවන්ද කියලා.
  • වඩා විශ්වාස කරන්නේ හදවත කියන දෙයද? නැත්නම් මොළය කියන දෙයද?
හදවත කියන දේවල්.

  •  හදවත සහ මොළය එකම අවස්ථාවේ දේවල් දෙකක් කියනවා කියලා ඔබට හිතෙනවාද?
ඔව්.
  • එහෙම හදවත කියන දේ කරලා ප්‍රායෝගිකව බිස්නස් කරන්න පුළුවන්ද?
මම හිතන්නේ ඇත්තටම පුළුවන්. හදවත නැතුව ගොඩක් තීරණ ගන්න පුළුවන්. එහෙත් ඉතා වැදගත් වෙන්නේ හදවත සහ මොළය කියන දෙක අතර සමබරතාවක් තියාගන්න එක. එතකොට ජීවිතය සාර්ථක වෙනවා.

මේ ගැන ඔබේ අදහසත් පහතින් Comment කරන්න....



0 comments: